Níu tonn af rabarbara af tæpum hektara
„Rabarbarinn hefur sprottið vel í sumar enda tíðin honum hliðholl, væta og hlýindi,“ segir Kjartan Ágústsson á Löngumýri á Skeiðum, sem ræktar rabarbara á tæpum hektara.
„Uppskeran af þessum tæpa hektara er tæp níu tonn þegar allt gengur vel og ég á ekki von á öðru en að það magn náist fyrir haustið. Ég er búinn að uppskera einu sinni en seinni uppskeran er eftir.“
Yrkið sem Kjartan ræktar kallast Queen Victoria, kemur upphaflega frá Bretlandi og er kennt við Victoriu, dóttur hertogans af Kent, sem síðar var krýnd drottning. Yrkið er stórvaxið með græna stöngla og gefur mikla uppskeru en þykir súrt.
Fyrri uppskera um miðjan júní
Kjartan segir að í venjulegu árferði hefjist vöxtur á rabarbara í seinni hluta apríl og sé kominn vel af stað um miðjan maí. „Fyrri uppskera í ár var upp úr miðjum júní og sú seinni verður fljótlega. Ég tek yfirleitt upp mikið magn af rabarbara í einu og því er mikil vinna meðan á uppskeru og frágangi stendur.
Fyrst þarf að taka hann upp og brjóta blöðkuna af og eftir að rabarbarinn kemur í hús er hællinn eða hófurinn skorinn af. Því næst er hann þveginn og stærstur hluti hans brytjaður í tveggja sentímetra bita auk þess sem ég sel lítinn hluta hans í heilum stilkum.
Kjarnavörur kaupa stóran hluta uppskerunnar en annað nota ég í sultur.“
Freistandi sultur
Sultan sem Kjartan býr til er tvenns konar og fljótlega mun sú þriðja bætast við. „Ég framleiði rabarbarasultu með aðalbláberjum og rabarbarasultu með jarðarberjum og engifer auk þess sem ég hef verið að þreifa mig áfram með rabarbara og hvönn en sú sulta er ekki kominn á markað.“
Lífræn ræktun
Kjartan segir að ræktunin hjá sér sé lífræn og að hann noti ekki skordýra- né illgresiseitur. „Blaðkan er brotin af stilkunum í garðinum og hún lögð á jarðveginn til að halda niðri illgresi. Ég hef verið blessunarlega laus við snigla og aðrar afætur að því undanskildu að grasmaðkur hefur verið að leggjast á blöðkurnar undanfarin sumur. Þegar verst lætur étur hann blöðkuna hreinlega upp þannig að ekkert er eftir nema grófustu trefjarnar,“ segir Kjartan Ágústsson, rabarbararæktandi á Skeiðum.
