Niturbindandi maís

Vonir eru bundnar við að nitur­bindandi maís sem finnst í suður­hluta Mexíkó eigi eftir að draga verulega úr áburðarnotkun í landbúnaði og auka stórlega mögu­leika á ræktun í ófrjósömu landi.

Jarðvegur í suðurhluta Mexíkó er víða næringarefnasnauður og sérstaklega er jarðvegurinn fátækur að köfnunarefni, eða nitri. Þrátt fyrir það hefur heimamönnum tekist í aldanna rás að rækta afbrigði af maís sem dafnar ágætlega við þannig aðstæður og nær allt að sex metra hæð.

Loftrætur og niturbindandi bakteríur

Nýlegar rannsóknir á afbrigðinu sýna að maísinn hefur þróað með sér loftrætur sem líkt og rætur belgjurta vinna nitur úr andrúmsloftinu með hjálp niturbindandi baktería. Loftræturnar, sem eru rauðar og allt að fingur að stærð, myndast við blaðaxlir á stofni plantnanna. Ræturnar mynda og eru umluktar slími sem niturbindandi bakteríur lifa í og plantan vinnur nitur úr.

Afbrigðið tekur um átta mánuði að ná fullum froska sem er of langur tími til að hægt sé að rækta það á norðurslóðum.

Plöntuvísindamenn binda vonir við að hægt verði að æxla saman eða með hjálp erfðatækni að flytja niturbindandi eiginleikana yfir á önnur hraðvaxta maísafbrigði sem nýtt eru til matvælaframleiðslu. Verði slíkt gerlegt mun það spara bændum gríðarlegan kostnað við áburðarkaup og áburðargjöf og lækka framleiðslukostnað matvæla. Auk þess sem niturbindandi maís mundi gera bændum í fátækari löndum kleift að rækta maís í meira mæli í ófrjóum jarðvegi og auka þannig fæðuframboð.

Tryggja verður eignarrétt

Áður en kynbætur með niturbindandi maísinn geta hafist verður að tryggja íbúum svæðisins þar sem hann vex lagalegan rétt á erfðaefninu sem það hefur þróað mann fram af manni. Þetta er gert til að fyrirbyggja það sem er kallað „biopiacy“ eða þjófnað á menningatengdri ræktun og þekkingu frumbyggja eða þjóðfélagshópa og tryggja eignarrétt þeirra og þeim hlut í ágóða við ræktun afbrigðisins í framtíðinni.

Fjöldi landsorta órannsakaðar

Maís er upprunninn í Mexíkó og þar er að finna fjölda landsorta sem búa yfir mikilli fjölbreytni sem eftir á að rannsaka.