Mun minni uppskera en á síðasta ári

Samkvæmt skráningum garðyrkjubænda á uppskeru beint af akri varð mikill samdráttur í uppskerumagni miðað við síðasta ár.

Samanlögð heildaruppskera er nú tæpum 2.500 tonnum minni, þegar uppskerumagn allra tegunda er lagt saman. Í ár var magnið 6.966 tonn en í fyrra 9.409 tonn.

Helgi Jóhannesson, garðyrkjuráðunautur hjá Ráðgjafarmiðstöð landbúnaðarins, segir að nákvæmar hektaratölur liggi ekki fyrir og því sé ekki hægt að reikna þetta niður á flatareiningu. Fyrirliggjandi er þó að umsóknum um styrki til útiræktunar grænmetis fækkaði um fimm á þessu ári miðað við síðasta ár.

„Sláandi munur er á gulrótauppskeru milli ára,“ segir Helgi, en um helmingi minni uppskera var nú miðað við í fyrra. „En það kemur á óvart að spergilkál sé svipað. Það er aukning í rauðkáli, líklega vegna meiri ræktunar – annars er þetta 20–30 prósent minna í tegundunum en í fyrra sem var reyndar ekkert sérstaklega gott ræktunarár heldur.“

Helgi segir að það sé mjög slæmt fyrir bændur að fá svo slaka uppskeru vegna þess að mest allur kostnaður við ræktun er greiddur fyrir fram og vegna aðhalds á markaði sé mjög erfitt að bæta tekjutapið með verðhækkunum.

„Sumarið var eins og menn muna kalt og frekar stutt, erfitt ræktunarár,“ heldur Helgi áfram. Hann bætir við að uppskerumagn á spergilkáli komi skemmtilega á óvart, þar sem allt bendi til að ræktun í hekturum hafi verið svipuð eða jafnvel minni en í fyrra á þeirri tegund.

Miðað við tíðarfarið og lakari uppskeru í öðrum tegundum komi það á óvart að uppskeran sé lítið minni en á síðasta ári.