Metfjöldi gesta á Skógardeginum mikla

Nýr Íslandsmeistari í skógarhöggi og fleiri keppnisgreinum var krýndur í Hallormsstað á dögunum.

Skógardagurinn mikli var að vanda haldinn í Hallormsstað á Fljótsdalshéraði í áliðnum júní. Til hátíðarinnar var stofnað árið 2005, af Skógræktinni, Félagi skógarbænda á Austurlandi og félögum sauðfjárog kúabænda á Héraði og Fjörðum.

Veður var blítt á hátíðardaginn, 21. júní, og segja aðstandendur að Skógardagurinn mikli hafi aldrei verið fjölmennari en í ár. Talið er að þetta hafi verið einn stærsti dagurinn hingað til og um og yfir 2.500 manns verið samankomnir.

Gómsætar veitingar

Hátíðin hófst á hádegi með skógarhöggskeppni, þar sem miklir snillingar í þeirri kúnst etja jafnan kappi og mjög hart er barist um sigur.

Náttúruskólinn bauð gestum og gangandi í rjóður þar sem búið var að súrra þrautabrautir og grilla mátti ormabrauð, tileinkað Lagarfljótsorminum, við opinn eld undir leiðsögn. Einnig var krökkum kennt að tálga og höggva eldivið. Í kjölfarið fór fram skemmtidagskrá á sviði í Mörkinni, þar sem kenndi ýmissa grasa í tónlist og mæltu máli. Sýndar voru býflugur og boðið á hestbak.

Veitingar Skógardagsins eru alltaf í meira lagi kræsilegar og fara menn ævinlega saddir og sælir frá hátíðinni. Félag nautgripabænda á Héraði og Fjörðum bauð upp á heilgrillað naut sem snúist hafði yfir eldi alla nóttina og morguninn. Nautakjötið er borið fram á trébrettum úr viði skógarins, niðursneitt í hæfilega munnbita og ljúffeng sósa boðin með. Ljómandi svínakjöt var einnig framreitt handa gestum. Félag sauðfjárbænda á Héraði og Fjörðum býður og jafnan upp á grillað lambakjöt, sem er mesta lostæti. Sjálfboðaliðar ganga um meðal gesta og bjóða smakk eins og hugurinn girnist.

Sömuleiðis bjóða skógarmenn upp á ketilkaffi og lummur í rjóðri. Sá sem ekki hefur smakkað alvöru ketilkaffi á margt eftir óupplifað. Jafnframt eru grillaðar pylsur í hundraðavís og gefnar þeim sem vilja.

Barist um titilinn

Þegar nokkuð var liðið á daginn fóru fram lokakeppnisgreinar í skógarhöggi og Íslandsmeistari var krýndur og honum færð verðlaun, að þessu sinni frá fyrirtækinu MHG. Var það Sigfús Jörgen Oddsson, sem sigraði einnig í keppninni árið 2017. Fékk hann í sigurlaun öryggisbuxur og jakka fyrir skógarhögg. Í öðru sæti var Mates Cieslar og því þriðja Ýmir Knútur Eiríksson.

Aðstandendur hátíðarinnar í ár voru Land og skógur Hallormsstað, Félag skógarbænda á Héraði og Fjörðum, Félag sauðfjárbænda á Héraði og Fjörðum og Félag nautgripabænda á Héraði og Fjörðum