Margt leynist í kryddbaukunum
Í nýlegri grein franska dagblaðsins Le Canard enchaîné, Allt frá kryddi til hárs, er spurt hversu mörg rottuhár gætu leynst í einni dollu af kanil. Þetta sé þörf spurning.
Segir frá því að franska neytendatímaritið 60 milljónir neytenda (f. 60 Millions de Consommateurs) hafi fyrr á árinu kannað innihald 40 tegunda af kryddum og jurtakryddblöndum. Meðal þess ókræsilegra sem fannst við þá skoðun voru hár af nagdýrum.
Af tíu tegundum kanils sem skoðaðar voru innihéldu tvær þeirra á milli 40 og 70 agnir af dýrahúð í hverjum 50 grömmum. Voru það ýmist litlir bútar af loðnum feldi eða fjaðrastykki, en oftast þó smástykki af skordýrum, allt upp í 570 agnir í hverjum 50 grömmum.
Aðeins þrjú vörumerki reyndust vera laus við dýraleifar. Í átta af þessum tíu tegundum fundust einnig leifar af plasti eða málmi og í þremur prósentum sýnanna reyndist vera mygla.
Hið jákvæða var að kanillinn sem athugaður var innihélt ekkert skordýraeitur.
Sömu sögu var ekki að segja um karrí og pipar sem skoðuð voru, þar sem tveir þriðju hlutar sýna reyndust innihalda leifar eins til fimm varnarefna. Tvö efnanna sem fundust eru á varúðarlista Evrópusambandsins og verða að líkindum brátt bönnuð.
Brellur eru líka iðkaðar í kryddiðnaðinum. Algengast er að bæta fylliefni saman við kryddin, t.d. ávaxtadufti eða kartöflusterkju, sem er mun ódýrara en kryddin sjálf. Í rannsókn tímaritsins kom þannig í ljós að sjö af hverjum tíu karrítegundum voru drýgðar með slíkum efnum.
Í síðustu yfirlitsskýrslu Fraud Repression (CCF) um svindl í jurtatengdri kryddframleiðslu mátti sjá að helmingur þeirra 179 sýna sem tekin höfðu verið uppfylltu ekki kröfur.
Í Frakklandi eru um 500 tonn notuð árlega af Herbes de Provence en rannsókn á jurtablöndunni (oft majoram, rósmarín, timian, oreganó o.fl.) gerði rannsakendur orðlausa. Þeir fundu skordýr eða rottuhár í níu af hverjum tíu krukkum. Helmingur þeirra var auk þess hlaðinn varnarefnaleifum og fundust allt að sjö slík í hverri krukku.
Frakkar hrukku í kút yfir þessum fregnum enda eru þeir þriðju mestu kryddneytendur Evrópu. Þeir nota yfir 2.000 tonn krydds árlega og hefur notkunin aukist um 30% á áratug.
