Lyfta heildinni með samstarfi
Eitt af helstu málunum sem voru rædd á fundi loðdýrabænda var áætlun um dýraskipti til þess að koma í veg fyrir skyldleikaræktun.
Á landinu eru eingöngu sex minkabú og eiga þau samtals rúmlega 8.500 læður. Eftir hrun minkaræktarinnar í Danmörku hefur lokast fyrir innflutning á kynbótadýrum og er nauðsynlegt fyrir greinina að bregðast við til að forðast skyldleikaræktun.
„Fyrir okkar búgrein skiptir máli að halda skyldleikaræktun í hófi með reglulegum skiptum á dýrum,“ segir Björn Harðarson, formaður deildar loðdýrabænda og minkabóndi í Holti í Flóa. Á deildarfundinum kynnti Ditte Clausen, ráðunautur hjá Ráðgjafarmiðstöð landbúnaðarins, tillögu að ræktunaráætlun sem miðar að því að lyfta heildinni.
Björn gerir fastlega ráð fyrir að allir minkabændur taki þátt í dýraskiptum þó svo að endanleg útfærsla ræktunaráætlunarinnar hafi ekki verið útfærð. Næstu skref felist í því að Ditte leggist yfir gögn frá öllum minkabúunum og leggi til hvernig best er að standa að kynbótum. „Ég geri ráð fyrir að allir taki þátt,“ segir Björn, því hagur bændanna sé mikill.
Miðað við horfur á mörkuðum segir Björn minkabændur spá tíu til fimmtán prósenta hækkun á minkaskinnum á næstu misserum. Á nýlegum uppboðum hafa fengist að meðaltali í kringum 5.000 krónur fyrir hvert minkaskinn, en hann segir að til að standa undir öllum kostnaði þyrftu minkabændur að fá 9.000 krónur á skinn.
Litlar breytingar urðu á stjórn deildar loðdýrabænda á fundinum. Í aðalstjórn, ásamt Birni, eru áfram Veronika Narfadóttir úr Túni og Hjalti Logason frá NeðriDal. Varamenn í stjórn eru Rúna Einarsdóttir frá Torfastöðum 2 og Bjarni Stefánsson úr Túni.
Björn bætir við að loðdýrarækt falli vel að loftslagsmarkmiðum Bændasamtaka Íslands. „Við nýtum lífrænan úrgang sem annars færi í urðun og breytum í útflutningsvöru. Nokkurn veginn allt okkar fóður er innlent.“
