Lífræni dagurinn haldinn hátíðlegur í fjórða sinn
Lífræni dagurinn var haldinn hátíðlegur um allt land laugardaginn 20. ágúst.
Þetta er fjórða árið í röð sem blásið er til slíkra hátíðarhalda hérlendis, en tilgangurinn er fyrst og fremst að vekja athygli á lífrænni ræktun og framleiðslu á Íslandi, minna á lífræna hugsjón og mikilvægi hennar og skapa vettvang til þess að færa lífræna framleiðendur nær neytendum.
Áfram stutt við Lífrænt Ísland
Það var Lífrænt Ísland sem stendur fyrir Lífræna deginum, sér um skipulagningu og framkvæmd hans. Lífrænt Ísland er samstarfsverkefni stjórnvalda, VOR, félags um lífræna ræktun og framleiðslu, og Bændasamtaka Íslands. Lífrænt Ísland hefur þann tilgang að auka sýnileika lífrænna málefna, miðla fræðslu og fréttum til neytenda og stuðla þannig að aukinni lífrænni framleiðslu á Íslandi. Eitt af markmiðum í aðgerðaáætlun stjórnvalda til eflingar lífrænnar framleiðslu er einmitt að styðja við verkefnið Lífrænt Ísland og sjá til þess að því verði viðhaldið og að haldinn verði lífrænn dagur árlega.
Að sögn Elínborgar Erlu Ásgeirsdóttur, formanns VOR, var stærsti viðburður Lífræna dagsins haldinn í Norræna húsinu. „Þar var meðal annars fjölbreyttur lífrænn markaður framleiðenda, fræðslu og skemmtidagskrá fyrir börn og lífrænt spjall þar sem gestum gafst færi á að ræða við lífræna bændur og fá upplýsingar og ráðleggingar. Starfsmenn Vottunarstofunnar Túns voru einnig á staðnum til skrafs og ráðagerða,“ segir Elínborg sem flutti ávarp ásamt Önnu Maríu Björnsdóttur, verkefnastjóra hjá Lífrænu Íslandi.
Samstarf við Matland
„Plantan Bistro, veitingastaðurinn í Norræna húsinu, var einnig með sérstakan rétt á matseðli sem gerður var úr lífrænt vottuðum íslenskum hráefnum í tilefni dagsins. Dagskráin endaði síðan á opinni sýningu á heimildamyndinni GRÓA, sem fjallar um lífræna ræktun á Íslandi og í framhaldinu voru umræður um efni myndarinnar. Fyrir áhugasöm er myndin einnig aðgengileg í Sjónvarpi Símans.
Fjögur lífræn býli voru með opið hús þennan dag, kynntu starfsemi sína og framleiðslu fyrir gestum og gangandi auk þess sem hægt var að kaupa lífrænar afurðir beint frá framleiðslustað. Þetta voru Akur organics á Þórshöfn, Móðir Jörð í Vallanesi á Fljótsdalshéraði, Búland í Austur-Landeyjum og Yrkja, Syðra Holti í Svarfaðardal. Það má því með sanni segja að Lífræni dagurinn hafi verið haldinn hátíðlegur um land allt,“ segir Elínborg enn fremur.
Hún segir að skipulag Lífræna dagsins hafi verið í þróun frá ári til árs þessi fjögur ár – og þetta árið varð sú nýbreytni að Matland var fengið í samstarf með Lífrænu Íslandi. „Það má í raun segja að Matland hafi tekið forskot á sæluna því fyrir lífræna daginn innihélt grænmetiskassi vikunnar hjá því einungis lífrænt vottað grænmeti. Þannig gat fólk pantað fullan kassa af lífrænt vottuðu íslensku grænmeti og fengið hann sendan hvert á land sem er. Vert er að nefna að Matland á einnig oft til sölu bæði lífrænt lambakjöt og nautakjöt.“
Framúrskarandi árangur
„Það er síðan sérstaklega ánægjulegt að segja frá því að á Lífræna deginum í ár afhenti atvinnuvegaráðuneytið í fyrsta skipti viðurkenningu fyrir framúrskarandi árangur í lífrænni framleiðslu,“ heldur Elínborg áfram. „Þar er um að ræða eitt af markmiðum úr aðgerðaáætlun stjórnvalda sem er komið til framkvæmda, en ráðgert er að afhending slíkrar viðurkenningar verði árviss héðan í frá á Lífræna deginum.
Það voru Kristján Oddsson og Dóra Ruf lífrænir kúabændur að Neðra-Hálsi í Kjós og stofnendur lífrænu mjólkurvinnslunnar Biobú sem hlutu viðurkenninguna í ár, auk mjólkurvinnslunnar sjálfrar, Biobú ehf.“
Afhending verðlaunanna fór fram í Norræna húsinu og veitti Bryndís Eiríksdóttir frá atvinnuvegaráðuneytisins viðurkenningar. Dóra var stödd erlendis en Kristján veitti viðurkenningunni viðtöku fyrir hönd þeirra hjóna og Helgi Rafn Gunnarsson framkvæmdastjóri Biobú fyrir hönd Biobú ehf.
