Lausnir á vandamálum í sauðburði
Í allmörg ár hefur verið venja hér í blaðinu að birta skýringarmyndir Þorsteins Ólafssonar og Hákons Hanssonar um lausnir á vandamálum í sauðburði.
Fyrir fimm árum bættist sauðfjárbændum við liðsauki fyrir þennan álagstíma þegar leiðbeiningarmyndbönd voru gefin út um burðarhjálp á YouTube og eru nú skráð 23 þúsund áhorf á þau myndbönd. Framleiðsla myndbandanna var í höndum Karólínu Elísabetardóttur í Hvammshlíð og Axels Kárasonar dýralæknis.
Flókin vandamál
Karólína segir að þau myndbönd sem hafa fengið langflest áhorf hafi verið „Afturábak“, „Legsnúningur“ og „Stór horn“ – sem sé rökrétt, því það séu flóknustu vandamálin að mati flestra bænda sem hún hafi talað við. Hún segir það áhugaverða staðreynd að flestir áhorfendur séu í aldurshópnum 25–31 ára, sem liggi kannski beint við þar sem í þeim hópi séu frekar ungir og ekki eins reyndir bændur, en næstflestir eru í aldurshópnum 45–54 ára – sem gefi til kynna að bændur séu alltaf spenntir fyrir því að læra eitthvað nýtt.
Útgáfur á öðrum tungumálum njóta vinsælda
Að sögn Karólínu eru myndböndin líka á þýsku og ensku og þær útgáfur njóta einnig talsverðra vinsælda, þó áhorfendur séu í langflestum tilfellum staðsettir á Íslandi.
Hún dregur þá ályktun að þannig þjóni þau vel tilgangi sínum, sem sé að veita erlendu aðstoðarfólki á íslenskum sauðfjárbúum góð ráð.
Öll hugsanleg burðarvandamál
Myndböndin eru alls 23, auk þess sem öll helstu myndböndin eru einnig til á þýsku og ensku. Þau eiga að ná til allra hugsanlegra burðarvandamála. Þá veitir Axel dýralæknir innsýn inn í hvað á sér stað inni í ánni, með notkun á lambalíkönum og mjaðmagrind í raunstærð.
Í tengslum við myndböndin var útbúið „ákvarðanatré“ sem er að sögn Karólínu gagnlegt tól til að greina aðsteðjandi vandamál við sauðburðinn skref fyrir skref.
Slóðirnar á myndböndin:
