Kílóverð lambalæris talið mun hærra en ýsuflaks
Í nýlegri könnun sem Prósent gerði fyrir Icelandic Lamb kemur í ljós að neytendur telja kílóverð lambalæris vera mun hærra en ýsuflaks. Alls töldu 41% svarenda að lambalærið væri meira en 50% dýrara en ýsuflakið.
Kílóverð á heilu lambalæri og roð- og beinlausu ýsuflaki hefur hins vegar verið á svipuðum slóðum og í ýmsum tilvikum hefur ýsuflakið verið dýrara.
Spurt var hversu mikinn verðmun fólk teldi vera á kílóverði annars vegar á roð- og beinlausu ýsuflaki og hins vegar á heilu lambalæri í matvöruverslunum. Af þeim sem tóku afstöðu töldu 80% að lambalærið væri dýrara.
Margir töldu lambalærið miklu dýrara
Alls bárust 912 svör. Af öllum svarendum töldu 65% að lambalærið kostaði meira en ýsuflakið.
Þar af töldu 24% að það væri 1–50% dýrara, 29% að það væri 51–100% dýrara og 12% að lambalærið væri meira en tvöfalt dýrara en ýsuflakið.
Tíu prósent svarenda töldu ýsuflakið dýrara og 7% töldu vörurnar kosta það sama. Þá sögðust 18% ekki vita svarið og 1% vildi ekki svara.
Í sömu könnun voru svarendur einnig beðnir um að áætla kílóverð nokkurra kjötvara og ýsuflaks í lágvöruverðsverslunum. Að meðaltali töldu svarendur kílóverð ýsuflaks vera 3.140 krónur, nautahakks 3.130 krónur, kjúklingabringna 3.079 krónur og grísakótiletta 3.039 krónur. Lambalærið skar sig hins vegar úr, en þar var áætlað kílóverð 5.106 krónur.
Lambakjöt „hrein náttúruafurð“
Í könnuninni var einnig spurt hvaða kjöt á Íslandi svarendum þætti passa best við lýsinguna „hrein náttúruafurð“. Af öllum svarendum nefndu 71% lambakjöt, 6% nautakjöt, 5% kjúkling og 1% svínakjöt. Fimm prósent töldu að engin þessara kjöttegunda myndi falla undir lýsinguna en 11% sögðust ekki vita. Af þeim sem tóku afstöðu völdu 81% lambakjöt.
Hafliði Halldórsson, framkvæmdastjóri Icelandic Lamb, segir að niðurstöðurnar sýni fyrst og fremst að íslenskt lambakjöt sé í miklum metum hvað ímyndina varðar. En um leið sýni könnunin að verðskynið sé takmarkað og fólk gefi sér að lambakjöt sé dýrara en það í rauninni sé. „Það styrkir okkur í þeirri vegferð að fræða almenning um búskapinn, afurðirnar og notagildið af okkar einstöku gæðavöru.“
