Karólína sæmd fálkaorðu
Höfundur: Ástvaldur Lárusson
Forseti Íslands sæmdi fjórtán Íslendinga heiðursmerki hinnar íslensku fálkaorðu á Bessastöðum 17. júní.
Þeirra á meðal er Karólína Elísabetardóttir, bóndi í Hvammshlíð, fyrir frumkvöðlastarf í baráttunni gegn riðu í sauðfé. Hún var ein helsta drifsprautan á bakvið leit að arfgerðum sem veita vernd gegn riðu í sauðfé, en eftir að þær fundust hafa vaknað vonir um að sauðfjárbændur nái að útrýma þessum sjúkdómi.
Fálkaorðuna fékk jafnframt Hákon Ingvi Hansson, dýralæknir á suðurfjörðum Austurlands, fyrir framlag til atvinnumála og samfélagsmála í heimabyggð.
Eins var Ólafur Arnalds jarðvegsfræðingur heiðraður með fálkaorðunni fyrir frumkvöðlastarf í rannsóknum á íslenskri náttúru og miðlun þeirra.
