Jákvæð útkoma á skinnamarkaðnum Copenhagen Fur í febrúar
Höfundur: smh
Frá því í september síðastliðnum hefur leiðin á skinnamörkuðum verið að mjakast upp á við á ný og á nýloknu febrúaruppboði á skinnamarkaði Copenhagen Fur í Kaupmannahöfn var sú þróun staðfest.
Verð á minkaskinnum fór í hæstu hæðir á árinu 2013, þegar meðalverð á skinnum fór í 12 þúsund íslenskar krónur. Síðan lá leiðin nokkuð hratt niður á við og náði lægst á fyrsta hluta síðasta árs og hafði verð þá fallið um rúm 50 prósent.
Öll skinnin seldust
Að sögn Einars E. Einarssonar, ábyrgðarmanns í loðdýrarækt hjá Ráðgjafarmiðstoð landbúnaðarins, voru í heildina boðnar til sölu um 6 milljónir minkaskinna á markaðnum.
„Öll skinnin seldust sem er mikilvægast. Meðalhækkun á uppboðinu er 11 prósent frá janúar, en þar af er styrking dollars gagnvart evru um fjögur prósent sem þýðir að kaupendur upplifa um sjö prósenta hækkun á markaðsverði frá því í janúar.“
Meðalverðið um átta þúsund íslenskar krónur
„Meðalverð allra seldra minkaskinna á uppboðinu var 409 danskar krónur eða um átta þúsund íslenskar. Frá Íslandi voru seld um 29 þúsund skinn sem er um 15 prósent af íslensku framleiðslunni. Þessi skinn deilast á marga flokka og því er erfitt að segja mikið um stöðu framleiðslunnar í samkeppni þjóðanna, en það sem hægt er að lesa úr tölunum verður þó að teljast jákvætt fyrir íslensku framleiðsluna,“ segir Einar.
„Ef þetta markaðsverð helst út sölutímabilið má segja að bændur geti vel við unað en þá er skinnaverðið aftur komið yfir framleiðslukostnað, en verðið var undir kostnaði á síðasta ári. Engu að síður verður samt að spyrja að leikslokum. Til viðbótar þessari miklu hækkun á dollar gagnvart evru þá hefur íslenska krónan líka verið að styrkjast hægt og rólega frá áramótum sem þýðir lægra skilaverð til bænda hér á landi Ég myndi samt segja að útlitið væri jákvætt og spennandi eins og svo oft áður í þessari grein,“ segir Einar.
Á Íslandi eru 32 minkabú og fjölgaði þeim aðeins á árunum 2012 og 2013, að sögn Einars. Um 70 prósent íslensku framleiðslunnar eru brún skinn.
