Íþyngjandi stjórnvaldsákvarðanir og sektir

Í apríl og maí í ár var úrskurðað um ellefu íþyngjandi stjórnvaldsákvarðanir á sviði eftirlits með dýravelferð og matvælaframleiðslu, níu í apríl og tvær í maí.

Á Vesturlandi var kúabú svipt mjólkursöluleyfi. Aðstæður í mjólkurhúsi þóttu ekki uppfylla kröfur laga og reglugerða og því var búið svipt leyfi til mjólkurframleiðslu.

Settar voru kröfur á sauðfjárbú á Vesturlandi og bændum á viðkomandi búi gert að fækka fé sínu verulega frá og með hausti 2024 vegna skorts á getu. Jafnframt var gert skylt að tryggja aðstoðarmann við sauðburð vorið 2024.

Sviptur heimild til dýrahalds

Matvælastofnun (MAST) lagði dagsektir á kúabónda á Norðvesturlandi til að knýja á um úrbætur í dýravelferð.

MAST kærði alvarlega vanrækslu á nautgripum á býli á Norðvesturlandi til lögreglu. Við eftirlit sem framkvæmt var með aðstoð lögreglu fundust 29 dauðir nautgripir í gripahúsi. Í kjölfarið aflífuðu starfsmenn stofnunarinnar 21 grip til viðbótar á staðnum sökum slæms ástands, allt gripi sem voru hýstir í húsinu. Aðrir nautgripir, sem hafði verið haldið úti við, voru hýstir yfir nóttina, en síðan voru þeir færðir til slátrunar daginn eftir. Hræjum og skrokkum hefur skv. upplýsingum MAST þegar verið fargað á viðurkenndum urðunarstað.

Matvælastofnun svipti umráðamanninn heimild til dýrahalds tímabundið, eða þar til dómur fellur í málinu. Í kæru til lögreglu gerir stofnunin þá kröfu að umráðamaður verði með dómi sviptur heimild til að hafa búfé í umsjá sinni, versla með þau eða sýsla með þau með öðrum hætti. Málið er nú til frekari rannsóknar hjá lögreglunni á Norðurlandi vestra.

Kind, hross og slasaðir fuglar

Á Norðurlandi sektaði MAST bónda vegna vanrækslu á kind. Í kjölfar eftirlits sumarið 2023 fékk viðkomandi bóndi stuttan frest til að láta dýralækni líta á kind sem var hölt jafnt á framfótum sem afturfótum eða aflífa kindina ella. Bóndinn brást ekki við fyrr en seint og um síðir. Stjórnvaldssekt var lögð á hann að upphæð 300.000 kr.

Á Suðurlandi gerði MAST kröfu um að þrjú gömul hross á Suðurlandi yrðu felld. Við eftirlit kom í ljós óviðunandi ástand á hrossunum og var eigandanum gert að fella þau.

Þá var sláturhús á Suðvesturlandi sektað fyrir brot á velferð holdakjúklinga við slátrun. Starfsmenn sláturhússins höfðu hengt sýnilega slasaða fugla upp á sláturlínu en samkvæmt reglugerð ber að aflífa slíka fugla strax. Stjórnvaldssekt nam 150.000 kr.

Vægasta úrræði beitt

Meðalhófsregla stjórnsýslulaga segir svo til um að þegar íþyngjandi stjórnvaldsákvörðun er tekin skuli beita vægasta úrræði sem völ er á og er nægjanlegt til að ná því markmiði sem er að stefnt (12. gr.).