Icelandic lamb veitti 21 veitingastað viðurkenningar
Í dag í Súlnasal Hótel Sögu veitti Oddný Steina Valsdóttir, formaður Landssamtaka sauðfjárbænda, 21 veitinga- og gististað viðurkenninguna „Icelandic Lamb Award of Excellence“. Það er markaðsstofan Icelandic lamb sem stendur að viðurkenningunum og eru þær veittar fyrir framúrskarandi matreiðslu á íslensku lambakjöti og eftirtektarverð störf við kynningu á íslensku lambakjöti til ferðamanna.
Í tilkynningu frá Icelandic lamb kemur fram að þetta sé í annað sinn sem viðurkenningar eru veittar samstarfaðilum Icelandic Lamb á sviði veitinga- og gististaða. Dómnefnd skipuð þeim Sigurlaugu Margréti Jónasdóttur útvarpskonu hjá RÚV, Dominique Plédel Jónsson hjá Slow Food Reykjavík og Hafliða Halldórssyni verkefnastjóra hjá Icelandic Lamb valdi staðina sem hlutu viðurkenningar að þessu sinni.
Veitingamennirnir samankomnir í Súlnasal Hótel Sögu í dag.
„Yfir 90 íslenskir veitingastaðir eru samstarfsaðilar sauðfjárbænda í gegnum verkefnið Icelandic Lamb sem ætlað er að undirstrika sérstöðu íslenskra sauðfjárafurða með tilvísun til uppruna, hreinleika og gæða. Árangurinn hefur farið fram úr björtustu vönum og sala á lambakjöti aukist verulega hjá veitinga- og gististöðum sem taka þátt í verkefninu,“ segir í tilkynningunni.
Staðirnir sem hlutu viðurkenningu að þessu sinni eru:
- Bjarteyjarsandur Hvalfirði
- Eldhúsið Restaurant-Gistihúsið Egilsstöðum
- Fiskfélagið
- Fiskmarkaðurinn
- Fosshótel Jökulsárlón Restaurant
- Grillið- Hótel Sögu
- Haust Restaurant - Fosshótel Reykjavík
- Hótel Anna
- Hótel Smyrlabjörg
- Íslenski Barinn
- Kopar
- Lamb Inn Eyjafjarðarsveit
- Matarkjallarinn
- Múlaberg Bistro
- Narfeyrarstofa
- Rústík
- Salka Húsavík
- Slippurinn Vestmannaeyjum
- Sushi Social
- Von Mathús Hafnarfirði
- VOX
