Hlaða Halldórsfjóss hýsir fræðslusýningu fuglafriðlandsins

Guðmundur Ingi Guðbrandsson umhverfisráðherra opnaði fyrsta áfanga Gestastofu friðlands fugla í Landbúnaðarsafni Íslands á Hvanneyri síðasta vetrardag, 24. apríl, og staðfesti verndaráætlun svæðisins. Í þessum áfanga er gert ráð fyrir fræðslusýningu um fuglafriðlandið í Andakíl, sem komið var á árið 2011, og þýðingu þess. 

 

Ragnhildur Helga Jónsdóttir er safnstjóri Landbúnaðarsafns Íslands og í ávarpi hennar við opnun Gestastofuáfangans kom fram að henni þætti vera ákveðinn sjarmi yfir því að hlaða Halldórsfjóss hýsti Gestastofuna – því hún ætti sér sögulega tengingu við nýtingu landsins í kringum hana. 

 

„Hér var vetrarforðinn af þessum miklu engjum hér fyrir neðan og síðar túnunum úti á mýrunum til suðausturs varðveittur, þannig að kýr skólans gætu lifað veturinn af. Og það er líka góð tenging að í ár eru 130 ár frá því að búnaðarfræðsla hófst hér á Hvanneyri og því er ágætt að geta komið formi utan um næsta þrep í fræðslustarfsemi hér á stað.“

 

 

Hún sagði að langþráðu marki væri náð en öllum mætti vera ljóst að einungis lítið skref væri nú stigið á þeirri leið sem vonast væri eftir að vera farin á næstu árum. Einhvers staðar þurfi að byrja og rétt væri að grípa tækifærið til að gleðjast saman.

 

Um leið og formleg opnun fyrsta áfanga er orðin að veruleika eru lögð drög að öðrum áfanga. Gengið var formlega frá ráðningu Brynju Davíðsdóttur náttúru- og umhverfisfræðings um ráðgjöf við næsta áfanga á viðburðinum síðasta vetrardag.

 

Fyrsti áfangi Gestastofunnar hefur notið styrkja, meðal annars frá Uppbyggingarsjóði Vesturlands, umhverfisráðuneyti, Borgarbyggð og Skorradalshreppi.