Góð afkoma hjá Stjörnugrís
Hagnaður Stjörnugríss nam rúmum 436 milljónum króna á síðasta ári. Félagið rekur kjötvinnslu og sölu á matvöru undir merkjum Stjörnugrís, Stjörnunaut og Stjörnufugl.
Heildarvelta félagsins árið 2023 nam um 6.244 milljónum króna og hækkaði um 45 prósent milli ára. Eignir félagsins í árslok námu um 2,8 milljörðum króna, eigið fé tæpir tveir milljarðar króna og skuldir um 833 milljónir króna. Þetta kemur fram í ársreikningi félagsins fyrir árið 2023.
Árið 2022 hagnaðist fyrirtækið um rúmar 39 milljónir króna en afkoma ársins 2021 var 325 milljónir króna.
Stöndugt fjölskyldufyrirtæki
Meginstarfsemi félagsins er rekstur á kjötvinnslu og sala á matvöru en eigendur félagsins eru fjölskylda sem hefur stundað svínabúskap frá árinu 1935, að því er fram kemur á vefsíðu Stjörnugríss. Geir Gunnar Geirsson á helming fyrirtækisins en hann er jafnframt forstjóri þess. Hjördís Gissurardóttir á 30,44 prósenta hlut og systurnar Hallfríður Kristín og Friðrika Hjördís Geirsdætur hvor sinn 9,78 prósenta hlut. Í ársreikningnum kemur fram að stjórn leggi til arðgreiðslu að upphæð 145 milljón króna vegna rekstrarársins 2023.
FEK ehf. er einnig í eigu fjölskyldunnar en tilgangur þess er að reka og leigja út fasteignir og jarðir í búrekstri. Fasteignir félagsins í árslok 2023 voru, samkvæmt ársreikningi: Saltvík, Melar, Bjarnastaðir, Sléttaból og Kálfhóll, Ás, Ásland og Sómastaðir, Esjugrund 24 og 36, Árvellir, Brautarholt, Hýrumelur, Gil og Sætún. Félagið Svínaríki ehf. var stofnað árið 2022 utan um rekstur svínabús Stjörnugríss en það var tekið yfir af Stjörnugrís í upphafi árs 2024. Þá tók Stjörnugrís einnig yfir félög í sinni eigu sem héldu utan um rekstur gyltubúa sinna á Gili, Brimnesi og Hýrumel, öll til heimilis að Vallá á Kjalarnesi. Stjörnugrís á einnig dótturfélögin LL42, sem skráð er fyrir innflutningskvótum á landbúnaðarvörum, sem og stóran hluta félagsins Melaveita ehf.
Arðbær eggjaframleiðsla
Stjörnuegg, systurfélag Stjörnugríss, skilaði einnig góðri afkomu árið 2023. Heildarveltan nam um tveimur milljörðum króna og hagnaður félagsins reyndist um hálfur milljarður króna sem er um 60 prósenta hækkun frá árinu áður.
Stjörnuegg hf. er eggjaframleiðandi með aðsetur á Kjalarnesi. Félagið er í 79 prósenta eigu Hjördísar Gissurardóttur og Hallfríður Kristín og Friðrika Hjördís eiga hvor sinn ellefu prósenta hlut. Þær eiga jafnframt félagið Skurn ehf. með aðsetur á sama stað.
