Getur leitt til offramleiðslu sem leiðir af sér lægra verð

Það var heldur þungt hljóðið í fundarmönnum á félagsfundi eyfirskra kúabænda sem haldinn var í Hlíðarbæ í liðinni viku og var sumum jafnvel heldur heitt í hamsi. Flestir þeirra sem til máls tóku í almennum umræðum voru lítt spenntir fyrir þeim samningsdrögum sem fyrir liggja varðandi nýjan búvörusamning.

 

Í ályktun sem samþykkt var á fundinum er lýst yfir miklum áhyggjum vegna þeirra samningsdraga sem bændum hafa verið kynnt, „þar sem gert er ráð fyrir að allri framleiðslustýringu verði hætt og að eitt verð gildi fyrir alla mjólk. Fundurinn telur að slíkt fyrirkomulag geti leitt til offramleiðslu sem óhjákvæmilega muni lækka verð til bænda,“ segir í ályktuninni.

 

Skoraði fundurinn á Bænda­samtökin og Landssamband kúabænda að skoða allar hugmyndir um nýjan samning og þær metnar út frá hagsmunum bænda og samfélagsins.  Lagði fundurinn til að Ragnar Árnason, prófessor við Háskóla Íslands, yrði fengin í þá vinnu og að um leið verði tryggt að fulltrúar afurðasölufélaganna komi að borðinu og fái tækifæri til að koma sjónarmiðum félaganna á framfæri við samningagerðina.

 

Þjóðhagslega óhagkvæmt að leggja greiðslumarkskerfið niður

 

Ragnar hélt erindi á fundinum og greindi frá niðurstöðum rannsóknarhóps sem hann setti saman til að kanna hugsanlegar afleiðingar breytinga á styrkjakerfi mjólkurframleiðslunnar. 

 

Niðurstaða hópsins er sú að þjóðhagslega óhagkvæmt sé að leggja greiðslumarkskerfi í mjólkurframleiðslunni af, en um slíkt hefur verið rætt í viðræðum ríkis og bænda um nýjan búvörusamning. Í stað greiðslumarkskerfisins er hugmyndin að taka upp greiðslur á alla framleiðslu. 

Líkur er á því samkvæmt rannsókn Ragnars að slíkt fyrirkomulag leiði til offramleiðslu sem kostar bæði bændur og þjóðfélagið mikla fjármuni.