Gærur seljast hægar en undanfarin á
Talsvert er enn óselt af gærum frá síðustu sláturvertíð. Innflutningsbann Rússa á vörur frá Evrópu og ófriðurinn í Úkraínu veldur því að framleiðendur mokkaskinnjakka í Evrópu halda að sér höndum þar sem þeir geta ekki selt framleiðslu sína.
Hægar hefur gengið að selja gæru í haust en undanfarin ár. Gunnsteinn Björnsson, framkvæmdastjóri Loðskinns á Sauðárkróki, sagði í samtali við Bændablaðið að innflutningsbann Rússa á vörur frá Evrópu og ástandið í Úkraínu sé þess valdandi að gærur frá nýliðinni sláturtíð séu að seljast hægar en á liðnum árum. „Það er ljóst að allur bransinn er í krísu út af ófriðnum og viðskiptabanninu. Yfirleitt hafa gærurnar farið hraðar.“
Rúmlega 300 þúsund óseldar
„Gærur af haustvertíðinni eru um 500 þúsund og ætli það séu ekki rúmlega 300 þúsund af þeim óseldar og að verðmæti um 200 milljónir króna. Gærurnar eru mikið seldar til Spánar, Ítalíu, Frakklands og Tyrklands þar sem þær eru unnar og saumaðar úr þeim flíkur sem eru seldar til Rússlands.
Vegna viðskiptabannsins geta framleiðendur á Spáni ekki selt sínar vörur til Rússlands eða Úkraínu vegna ófriðarins. Það sem hefur selst fæst hægt greitt og alls konar ljón í veginum og það skilar sér í minni eftirspurn eftir gærum,“ segir Gunnsteinn.
Lausafjárstaða á öllum stigum
Gunnsteinn segist ekki hafa miklar áhyggjur þrátt fyrir að salan gangi hægt eins og er. „Miðað við ástandið á markaði kemur mér ekki á óvart að salan sé treg. Það er lausafjárskortur á öllum stigum bransans sem stafar af aukinni birgðasöfnun. Eftirsókn eftir mokkaskinnjökkum í Rússlandi hefur ekki minnkað, það er einfaldlega bannað að flytja vöruna þangað.
Við erum að fá milli 800 og 900 krónur fyrir gæruna sé flutningskostnaður innifalinn sem er ásættanlegt verð. Ég á ekki von á öðru en að gærurnar mjatlist út en það mun bara taka lengri tíma en í býsna mörg undanfarin ár. Í fyrra seldust til dæmis allar gærur nánast um leið og þær voru í boði.“
