Fundur fólksins hefst í dag - er í beinni vefnum

Í dag hefst þriggja daga lífleg hátíð í Norræna húsinu um samfélagsmál, með yfirskriftinni Fundur fólksins. Þar kemur fólk saman úr ólíkum áttum til að ræða málefnin og meðal annars munu fulltrúar frá Bændasamtökunum og búgreinafélögum kynna starfsemi samtakanna og kynna fyrir gestum og gangandi íslenskan landbúnað. Setningin hefst klukkan 12.

„Nú eru yfir 100 atriði á dagskrá og um 40 félagasamtök taka þátt og enn eru að bætast við atriði á hátíðina. Dagskráin fer fram bæði inni í Norræna húsinu og í tjaldbúðum á lóðinni í kringum húsið. Í tjaldbúðunum verða félagasamtök, stjórnmálaflokkar og aðrir hagsmunaaðilar með starfsemi alla hátíðardagana. Í bland við líflegar umræður verður boðið upp á tónlist og aðrar uppákomur,“ segir Þuríður Helga Kristjánsdóttir, verkefnisstjóri Fundar fólksins. 

 

 

Mikilvægur vettvangur samfélagsumræðu

 

Fundur fólksins er fyrsta hátíð sinnar tegundar á Íslandi en sambærilegar hátíðir eru orðnar ómissandi hluti af hverju sumri hjá hinum Norðurlandaþjóðunum. Aðstandendur hátíðarinnar eru Norræna húsið, Norðurlönd í fókus, Alþjóðamálastofnun Háskóla Íslands, Almannaheill, Reykjavíkurborg og samstarfs­ráðherra Norðurlanda.

 

„Sambærileg hátíð og ein sú þekktasta er án efa Almedalsveckan í Svíþjóð, sem er orðin einn stærsti og mikilvægasti vettvangur sænskrar samfélagsumræðu. Hátíðin er sjálfstæð og ekki tengd neinum hagsmunaöflum á Íslandi eða annars staðar, markmið hennar er að auka tiltrú á stjórnmálum og styrkja uppbyggjandi pólitíska umræðu,“ útskýrir Þuríður. 

 

Þátttakendur í hátíðinni eru:

 

Almannaheill, Alþjóða­málastofnun Háskóla Íslands, Alþýðufylkingin ASÍ, Bandalag íslenskra listamanna, Björt framtíð, Bændasamtökin, Evrópu­stofa, Fjölmiðlanefnd, Framsóknar­flokkurinn, Heimili og skóli, Landvernd, MND-félagið, Neytendasamtökin, Norður­slóðasetur, Norræna félagið, Píratar, Rannsóknarmiðstöð ferðamála, Rauði kross Íslands, Reykjavíkurborg, Samband íslenskra myndlistarmanna, Samfylkingin, Samstarfsráðherra Norðurlanda, Samtök atvinnu­félagsins, Samtök kvenna af erlendum uppruna, Samtökin móðurmál,  Sjálfstæðisflokkurinn, Skátarnir, Siðmennt, Slow food – Ísland, Starfsgreinasambandið,  Stjórnarskrárfélagið, UNICEF og Vinstri græn.