Fuglaflensan útbreidd í villtum fuglum

Matvælastofnun greindi frá því um helgina að sýnatökur úr villtum fuglum í síðustu viku hafi leitt í ljós að skæða fuglaflensan, sem hefur verið til umfjöllunar í fjölmiðlum á undanförnum vikum, sé útbreidd í villtum fuglum. Smithætta sé því mikil fyrir alifugla og aðra fugla í haldi manna.

„Fuglaflensuveirur af gerðinni H5 greindust í átta sýnum af fimmtán sem tekin voru úr villtum fuglum í vikunni og rannsökuð á Tilraunastöð HÍ að Keldum. Fimm sýni voru með óljósa svörun og verða rannsökuð nánar, en í tveimur sýnum greindust ekki fuglaflensuveirur. Sýni sem tekin voru úr alifuglum á tveimur stöðum í vikunni voru öll neikvæð. Matvælastofnun ítrekar mikilvægi þess að fuglaeigendur verndi fugla sína gegn smiti.

Af þeim átta sýnum sem reyndust jákvæð voru þrjú úr súlum sem fundust í Njarðvík og Grindavík, þrjú úr súlum á Búðum á Snæfellsnesi, eitt úr grágæs á Akureyri og eitt úr svartbak á Húsavík,“ segir í umfjöllun á vef Matvælastofnunar.

Stöðugar og strangar sóttvarnir

„Fuglar sem haldnir eru að hluta til utandyra og í húsum þar sem smitvarnir eru ófullnægjandi, eru í mestri hættu að smitast. Til að koma í veg fyrir sjúkdóm í viðkomandi hópi fugla og um leið tryggja að ekki berist smit úr þeim í villta fugla er nauðsynlegt  að viðhafa stöðugar og strangar sóttvarnir þar sem fuglar eru haldnir.

Þeir þættir sem vega þyngst í að vernda alifugla gegn smiti er að hafa þá innandyra eða undir þaki í lokuðu gerði þar sem villtir fuglar komast ekki að og drit frá villtum fuglum getur ekki fallið í gerðið. Við daglega umhirðu fuglanna er best að nota sérstakan skó- og hlífðarfatnað, sem ekki er notaður utan þess húss og gerðis sem fuglarnir eru í,“ segir ennfremur í umfjöllun Matvælastofnunar.

Nánar má lesa um aukið viðbúnaðarstig og smitvarnir í annarri umfjöllun Matvælastofnunar frá 1. apríl 2022.