Frumvarp um hringrásarhagkerfi samþykkt á Alþingi

Á lokadögum Alþingis, rétt fyrir miðjan júní, var frumvarp Guðmundar Inga Guðbrandssonar, umhverfis- og auðlindaráðherra, um hringrásarhagkerfi samþykkt. Um innleiðingu Evróputilskipana er að ræða sem ætlað er að skapa skilyrði fyrir myndun hringrásarhagkerfis sem felst meðal annars í bættri endurvinnslu úrgangs, að draga úr myndun hans og minnka stórlega urðun.

Markmiðið með frumvarpinu er að draga úr auðlindanotkun, auka líftíma auðlinda jarðar og koma í veg fyrir að efni og hlutir hverfi úr hagkerfinu sem úrgangur en nýtist í staðinn sem hráefni í margvíslegum tilgangi.

Lögin, sem taka að mestu leyti gildi 1. janúar 2023, skylda heimili og fyrirtæki til flokkunar á heimilisúrgangi og sveitarfélögin til sérstakrar söfnunar á fleiri úrgangstegundum en verið hefur, svo sem lífrænum úrgangi, textíl og spilliefnum.

Útgáfa heildarstefnu í úrgangsmálum

Stuttu fyrir samþykkt frumvarpsins á Alþingi var heildarstefna Guðmundar Inga í úrgangsmálum gefin út, sem kallast Í átt að hringrásarhagkerfi. Stefnan styður við myndun hringrásarhagkerfis á Íslandi og er lykilaðgerð í að draga úr losun gróðurhúsalofttegunda frá úrgangi.

Heildarstefnan skiptist í tvo meginhluta; stefnu um úrgangsforvarnir, Saman gegn sóun, og stefnu um meðhöndlun úrgangs. Stefnan um úrgangsforvarnir, sem kom út árið 2016 og gildir til 2027 miðar að því að koma í veg fyrir myndun úrgangs og verður það gert með aukinni nýtni, nægjusemi og minni sóun. Stefna um meðhöndlun úrgangs, er ný og kemur í stað Landsáætlunar um meðhöndlun úrgangs 2013-2024. Hún gegnir mikilvægu hlutverki við innleiðingu hringrásarhagkerfisins og hefur þrjú meginmarkmið; að draga úr losun gróðurhúsalofttegunda frá meðhöndlun úrgangs, að stuðla að sjálfbærri auðlindanýtingu og að úrgangur sé meðhöndlaður á þann hátt að hann skapi ekki hættu fyrir menn eða dýr eða valdi skaða í umhverfinu.