Friðheimar kaupa Jarðarberjaland

Eigendur Friðheima, Knútur Rafn Ármann og Helena Hermundardóttir, munu taka við rekstri gróðrarstöðvarinnar Jarðarberjalands í Reykholti í Biskupstungum um áramótin.

Hólmfríður Geirsdóttir og Steinar Jensen hafa rekið Jarðarberjaland frá árinu 2017 en þau hafa komið víða við í garðyrkju undanfarna áratugi og rekið gróðrarstöðvar í Reykholti í tæpan aldarfjórðung.

Þau auglýstu Jarðarberjaland til sölu í vor, en þau hafa ákveðið að fara á eftirlaun. Þau eru stærsti framleiðandi jarðarberja á Íslandi, með rúmlega 60 tonn af berjum á ári.

Þau keyptu gróðrarstöðina af hollenskum aðilum sem byggðu hana frá grunni og færðu sig yfir í jarðarberjarækt tveimur árum áður en Hólmfríður og Steinar tóku við.

Endurbyggðu frá grunni

„Við vorum nýbúin að endurnýja allt þegar húsið hrynur í óveðrinu í febrúar 2022. Þá fjarlægðum við húsið með öllu saman og byggðum upp aftur frá grunni,“ segir Hólmfríður.

Þau plöntuðu í nýja gróðurhúsið í byrjun desember 2022 og fengu uppskeru nokkrum mánuðum síðar.

„Húsinu er skipt upp í tólf einingar og það rúllar í gegnum árið. Uppskeran er svipuð frá mánuði til mánaðar, en hlutirnir gerast aðeins hraðar á sumrin,“ segir Hólmfríður. „Það verður allt í fullum gangi þegar þau taka við og ég held áfram alveg fram á síðasta dag.“

Spennandi tækifæri

Knútur segist spenntur fyrir því að koma að rekstri Jarðarberjalands og nefnir sérstaklega að stöðin sé í frábæru ásigkomulagi og tæknivædd eftir að hún var byggð upp á ný.

„Þetta er spennandi tækifæri til að útvíkka okkur sem ræktendur. Við getum fléttað þetta auðveldlega inn í okkar rekstur í garðyrkjunni, en þó að þetta séu ekki tómatar er svo margt sem er keimlíkt,“ segir hann.

„Jarðarberin eru gott dæmi um hágæða vöru úr íslenskri ylrækt. Hér er verið að nota græna orku og hugvit og þetta er gert á eins faglegan og góðan hátt og hægt er með gæðin í forgrunni,“ segir Knútur.

Helena bætir við að hún sé stolt af því að taka við keflinu af Hólmfríði og Steinari.