Egg frá búrhænum ekki í boði

Nýverið gaf Krónan það út að egg frá eggjabúum þar sem hænur eru aldar í búrum yrðu ekki í boði í verslunum Krónunnar frá og með 1. júní 2017.

 

Sigurður Gunnar Markússon, framkvæmdastjóri innkaupasviðs Krónunnar, segir að ástæðan fyrir þessari ákvörðun sé sú að Krónan hafi mótað sér stefnu um samfélagslega ábyrgð og hluti af henni snýr að dýravelferð. „Það liggur fyrir að það verður bannað að hafa varphænur í búrum og gefinn rúmur aðlögunartími að því. Við vildum einfaldlega taka afstöðu í þessu máli og vera á undan reglugerðunum,“ segir Sigurður.  

 

Búrhænuegg eru um 38 prósent allra eggja í Krónunni

 

„Við höfum selt egg frá fjórum framleiðendum; sumir eru eingöngu með lausagönguvarphænur, en aðrir eru með þetta blandað. 

 

Salan er nokkuð misjöfn milli verslana og í sumum verslunum fást eingöngu egg úr varphænum sem ekki eru í búrum. 

 

Sala á lífrænt vottuðum eggjum hefur tekið mikið stökk upp á við og er í sumum verslunum hjá okkur orðin 20 prósent af heildarmagni. Sölu­dreif­ingin hjá okkur er þannig, að 15 prósent eru lífrænt vottuð egg og um 47 prósent eru úr lausagöngu – saman­lagt um 62 prósent. Sala frá búr­­­hænu­eggjum er því um 38 prósent.

 

Eftir að hafa rætt þetta breytta fyrirkomulag við bændur, teljum við eðlilegt að gefa framleiðendum svolítinn aðlögunartíma og þess vegna er þessi góði fyrirvari tilkominn,“ segir Sigurður.

 

Búrin bönnuð eftir 31. desember 2021

 

Brigitte Brugger, dýralæknir alifuglasjúkdóma hjá Matvæla­stofnun, segir að húsakosturinn á eggjabúum sé talsvert að breytast. „Það er víða unnið að því að taka ný hús í notkun fyrir lausagönguhænur,“ segir Brigitte en hefðbundin óinnréttuð búr verða bönnuð eftir 31. desember 2021. „Eggjabú eru 13 talsins og nokkur þeirra eru bæði með lausagönguhús og hús með búrum. Mér sýnist skipting vera þannig að um 64 prósenta hæna séu haldnar í hefðbundnum búrum og 35 prósent hæna vera í lausagönguhúsum – og hluti þeirra með aðgang að útisvæði,“ segir Brigitte.