Dýravelferðarmál á borði matvælaráðherra
Þingmálaskrá ríkisstjórnarinnar fyrir 155. löggjafarþing 2024– 2025 var lögð fram við upphaf þings. Af þeim 18 málum sem eru á borði matvælaráðherra varða fimm þeirra íslenskan landbúnað og bændur.
Í október er áætlað að leggja fram frumvarp til breytinga á jarðalögum, þar sem forkaupsréttur sameigenda verður meðal annars skýrður.
Brugðist við stjórnsýsluúttekt
Í sama mánuði verður frumvarp til laga um breytingu á lögum um velferð dýra tekið fyrir. Í greinargerð fyrir frumvarpið kemur fram að þörf sé á endurskoðun ýmissa ákvæða laganna. Fyrir liggi meðal annars að nauðsynlegt sé að bregðast við stjórnsýsluúttekt Ríkisendurskoðunar á eftirliti Matvælastofnunar með velferð búfjár til að tryggja skilvirkni stjórnsýslu á málefnasviðinu.
Þá verður lögð fram þingsályktunartillaga um stefnumótun á sviði dýravelferðar í októbermánuði. Í greinargerð fyrir hana segir að margt hafi áunnist frá setningu núgildandi laga um velferð dýra frá 2013. Tímabært sé þó að taka málaflokkinn til gagngerrar skoðunar, meðal annars í ljósi aukinnar vitundar og þekkingar á velferð dýra og samfélagslegra breytinga.
Slík stefnumótunarvinna sé vel til þess fallin að setja fram með skýrum hætti hvaða breytingum frá núverandi ástandi er mikilvægt að ná fram og hvernig, og öðlast með því skýra sýn til framtíðar.
Þá sé einnig mikilvægt að unnið verði að aðgerðaáætlun í kjölfarið þar sem aðgerðir og verkefni til að ná settu markmiði stefnunnar eru útfærð.
Heildarendurskoðun á lögum um dýraheilbrigði
Frumvarp til laga um breytingar á ýmsum lögum um dýrasjúkdóma og varnir gegn þeim, er á áætlun í nóvember. Með frumvarpinu eru lagðar til ýmsar nauðsynlegar breytingar á lögunum til þess að ná fram þeim markmiðum sem fram koma í nýrri landsáætlun um riðuveikilaust Ísland árið 2044. Auk þess verða í frumvarpinu nauðsynlegar breytingar sem gera þarf í tengslum við varnir gegn öðrum smitsjúkdómum.
Þá er á áætlun fyrir febrúar á næsta ári að leggja fram þingsályktunartillögu um stefnumótun á sviði dýrasjúkdóma, dýralækna og heilbrigðisþjónustu við dýr.
Fyrirhugað er að taka lög um heilbrigði dýra til heildarendurskoðunar og mun Sigurborg Daðadóttir, fráfarandi yfirdýralæknir, leiða þá vinnu. Í greinargerð segir að margt hafi breyst frá setningu laganna, bæði innanlands en einnig á alþjóðlegum vettvangi. Því sé brýnt að ná fram skýrri stefnu sem hafi beina tengingu við þá framtíðarsýn sem birtist í matvælastefnunni um að öll matvælaframleiðsla miði að heilbrigðu umhverfi, heilsu fólks og heilbrigði dýra – í anda Einnar heilsu-stefnunnar.
