Bylting í ostaframleiðslu smáframleiðenda

Árið 1998 var fyrsta ostasamlag smáframleiðenda fyrir kúamjólk stofnað í Noregi en í dag hefur tala þeirra margfaldast þar sem 122 ostasamlög eru nú skráð í félagið Norsk Gardsost. Þegar heimsmeistaramótið í ostum var haldið í Bergamo í Ítalíu í október voru nokkrir tugir norskra osta sem unnu verðlaun.

Heimsmeistaramótið í ostum hefur verið haldið í 32 ár og eru forsvarsmenn skipuleggjandans Guild of Fine Food hugfangnir yfir því hvernig norskir framleiðendur koma á hvert mót með nýjar hugmyndir og ostagerðir sem vinna hver verðlaunin á fætur öðrum.

Á heimsmeistaramótinu í október unnu norskir ostar til þrennra súpergullverðlauna, fengu þrenn gullverðlaun, níu silfurverðlaun og níu brons.

„Þegar ég byrjaði með veitingastaðinn Sult árið 1996 hér í Noregi var norskur ostur algjörlega óáhugaverður og enginn bað um það á meðan norskt lambakjöt og fiskur var eitthvað sem fólk bað sérstaklega um. Það gat verið að fólk hugsaði að norskur ostur væri lélegur en það var ekki einu sinni hugsunin, það var bara ekkert til umræðu,“ útskýrir Bernt Bucher Johannessen, framkvæmdastjóri Hanen-samtakanna í Noregi.

Mikilvægi smáframleiðandanna er að keppa í gæðum og einhverju sérstöku við vöruna og því hafa margir að leiðarljósi að búa til ost sem er eins ólíkur og því sem stóru iðnaðarmjólkursamlögin gera. Innan Norsk Gardsost-samtakanna eru smáframleiðendurnir einnig duglegir að vinna saman og deila ráðum þó að allir séu í raun í samkeppni með sínar vörur og telur Bernt það einn af lykilþáttum þess að svo vel gengur í dag hjá framleiðendunum að selja sínar vörur og koma þeim á þann stall sem þær eru í dag. Á heimsmeistaramótinu í október unnu norskir ostar til þrennra súpergullverðlauna, fengu þrenn gullverðlaun, níu silfurverðlaun og níu brons.