Bjóða vetur konung velkominn með hrútaþukli í 101 Reykjavík
Laugardaginn 25. október, fyrsta vetrardag, verður kjötsúpudagurinn á Skólavörðustíg haldinn hátíðlegur, tólfta árið í röð. Dagskrá hefst klukkan 14:00 með því að föngum í Hegningarhúsinu verður færð rjúkandi góð kjötsúpa. Strax í kjölfarið gefst almenningi kostur á að gæða sér á rjúkandi heitri súpu á nokkrum stöðum í götunni.
Að loknu súpusmakki, kl. 16:15, verður hrútaþukl á KEX Hostel við Skúlagötu. Hrútaþukl er keppni þar sem menn spreyta sig á að dæma hrúta og meta hvernig þeir henta til kynbóta. Þjóðþekktir einstaklingar munu taka þátt og mun hæfasti þuklarinn hljóta vegleg verðlaun.
Böðvar E. Guðjónsson, framkvæmdastjóri KEXLAND, segir að mikil tilhlökkun ríki í sínum herbúðum fyrir laugardeginum;
„KEX hefur verið í góðu samstarfi við Landssamtök Sauðfjárbænda og hófst það með rúningskeppni sem haldin var á KEX í vor og kallast Gullnu Klippurnar. Okkur í KEXLANDI þykir vænt um íslensku sauðkindina og viljum veg hennar sem mestan. Því kviknaði sú hugmynd að fá íslensku sauðkindina í 101 Reykjavík til að kynna borgarbörnum ágæti hennar, þ.e., ef þú kemst ekki í sveitina þá færum við sveitina til ykkar. Hrútaþuklið er eðlilegt framhald Gullnu Klippanna og einnig fannst okkur við hæfi að bjóða Vetur Konung velkominn með þessum viðburði. Hvað er meira íslenskt en hrútaþukl á KEX og ekki skemmir fyrir að við munum bjóða gestum og gangandi upp á ramm-íslenska kjötsúpu á meðan á viðburðinum stendur.“
Þekktir einstaklingar koma að dæma hrútana og einnig munu vanir dómarar taka þátt í þuklinu. Enn fremur mun kynnir lýsa því sem fram fer þannig að þetta er viðburður sem ekki einungis gleður heldur fræðir á sama tíma. Meðal dómara má nefna Guðmund Jörundsson fatahönnuð, Bjarna Snæðing og hjónin geðþekku Magna og Hugrúnu í KronKron.
