Bændur tilkynni bógkreppu í lömbum

Ráðgjafarmiðstöð landbúnaðarins óskar eftir að bændur tilkynni áfram bógkreppu og aðra hugsanlega erfðagalla til miðstöðvarinnar.

„Ef lömb fæðast sem bera hugsanlega einkenni bógkreppu, er áfram mikill akkur í því að fá úr þeim DNA-sýni. Enn er í þróun erfðapróf fyrir bógkreppu og mikilvægur liður í að bæta það próf er að fá sýni úr lömbum sem örugglega bera þennan erfðagalla,“ segir Eyþór Einarsson, ráðunautur á búfjárræktar- og þjónustusviði RML. Yfirleitt drepist þessi lömb í burði, en engu að síður sé rétt að gefa þeim lambanúmer og taka úr þeim DNA-sýni.

Sýnagreining og rannsókn hræja

Óskað er eftir að haft sé samband við RML og látið vita ef fæðist vanskapað lamb og grunur um að það sé með bógkreppu. Taka þurfi af því greinilegar myndir. Jafnframt sé æskilegt að fá (frysta) skrokka af bógkreppulömbum til rannsókna á Tilraunastöð Háskóla Íslands í meinafræði að Keldum. Greining á sýni og skoðun hræja sé bændum að kostnaðarlausu.

Aðaleinkenni bógkreppu eru, að sögn Eyþórs, stuttir og krepptir framfætur sem ekki er hægt að rétta úr. Snúningar í framfótum geta verið mismiklir en yfirleitt eru framfætur það krepptir að þótt lambið lifi gengur það á hnjánum. Bitgallar fylgja ekki klassískri bógkreppu, en skyld vansköpun er þekkt, sem kallast transeiði (neðri skoltur lengri en efri skoltur) og snúnir fætur. Sýni og upplýsingar um lömb með þá vansköpun er einnig mikilvægt að fá inn til RML.

Ekki algengt en gerist þó

Þó ekki sé algengt að vansköpuð lömb fæðist er sagt afar mikilvægt að halda utan um slíkar upplýsingar til að hægt sé að sporna við útbreiðslu erfðagalla. Sérstaklega sé þetta mikilvægt þegar um afkvæmi sæðingastöðvahrúta er að ræða. Aðrir gallar sem megi sérstaklega nefna og gott sé að vita af eru klofinn hryggur (opin rauf ofan í mænugöng aftarlega á hryggnum og lambið lamað í afturparti) og naflaslit.