Átta íbúða hús tilbúið á einu ári

Rúmlega eitt ár leið frá því Íslenska kalkþörungafélagið fékk út­hlutað lóð við Tjarnarbraut á Bíldu­dal til að byggja þar hús þar til það var tekið í notkun fullbúið. Húsið er raðhús á tveimur hæðum, alls 435 fermetrar að stærð og í því eru átta litlar íbúðir. 

 

„Það hefur verið viðvarandi skortur á húsnæði í öllu héraðinu, ekki bara á Bíldudal heldur líka í nágrannabyggðum, Patreksfirði og Tálknafirði,“ segir Einar Sveinn Ólafsson, nýfjárfestingastjóri hjá Marigot hér á landi, en félagið er eigandi Ískalks á Bíldudal. Íbúðirnar eru ætlaðar fyrir starfsfólk félagsins. Ekki hefur verið byggt nýtt hús á Bíldudal í tæplega þrjá áratugi, eða frá árinu 1989.

 

Smíðað í Eistlandi og allt fylgir með

 

Bæjarstjórn Vesturbyggðar úthlutaði félaginu lóðinni í fyrrasumar. Húsið er smíðað í Eistlandi og flutt hingað til lands. Húsið var tekið í notkun með opnu húsi fyrir íbúa Bíldudals og nærsveita, sveitarstjórnarfólk og alþingismenn voru á meðal gesta og eins kom Ásmundur Einar Daðason, ráðherra húsnæðimála. Um eitt hundrað manns litu inn og skoðuðu húsið og íbúðirnar.

 

Húsið er smíðað frá grunni í Eistlandi, hjá byggingafyrirtækinu Akso-Haus, sem einnig annaðist uppsetningu þess í Bíldudal og sá um allan frágang en íbúðirnar eru afhentar fullbúnar til innflutnings, búið að mála, leggja gólfefni, setja upp eldhúsinnréttingu og raftæki, húsgögn sömuleiðis og á baðherbergi sem er dúkalagt eru öll tilheyrandi tæki.  Gólfhiti er í gólfum baðherbergja en sérstök varmadæla í hverri íbúð hitar önnur rými.

 

Gekk hratt fyrir sig

 

Einar Sveinn segir að verkið hafi gengið hratt fyrir sig. Skipafélagið Atlantic Shipping ehf., umboðsaðili Akso-Haus, sá um flutning húseininganna til landsins ásamt steyptri botnplötu sem framleidd var í Eistlandi og eins flutti það öll húsgögn í íbúðirnar átta en þau fylgdu með í kaupunum. 

 

„Frá því flutningaskipið með farminn lagðist að bryggju við Bíldudal tók aðeins um hálfan mánuð að reisa húsið, tengja lagnir og leggja lokahönd á verkið til að unnt yrði að flytja inn,“ segir hann.

 

Eina færa leiðin

 

Ástæðu þess að Íslenska kalkþör­unga­félagið fer þessa leið, aflar sér byggingaleyfis og reisir hús á Bíldudal, segir Einar Sveinn vera þá að mikill og viðvarandi skortur hafi verið á húsnæði í Bíldudal og hefði það hamlað nýráðningum til að uppfylla mannaflaþörf fyrirtækisins. Forsendur hafi ekki verið til staðar fyrir einstaklinga, einkum ungt fólk, til að ráðast í húsbyggingar á staðnum né heldur hafi verið kostur á kaupum á eldra húsnæði, auk þess sem lánastofnanir láni einungis að hámarki fyrir 70% af fasteignamati. 

 

„Við töldum að þetta væri eina færa leiðin, að ráðast á eigin kostnað í byggingu íbúðarhúsnæðis á Bíldudal sem við síðar getum selt á almennum markaði ef og þegar aðstæður skapast til þess,“ segir hann. Fjárfestingakostnaður við verkið er í kringum 300 milljónir króna með smíði, húsgögnum, flutningi, uppsetningu og öllu sem til þarf til að flytja inn í íbúðirnar.