Athugasemdir við rangan málflutning Félags atvinnurekenda
Steinþór Skúlason, varaformaður Landssamtaka sláturleyfishafa, segir ekki annað hægt en að gera athugasemdir við rangan málflutning Félags atvinnurekenda á síðum Viðskiptablaðsins vegna áætlana stjórnvalda að nota stuðla við útreikning á innflutningskvóta kjöts.
„Samningur við Evrópusambandið um tollamál er gagnkvæmur samningur þar sem Ísland eykur innflutningsheimildir meðal annars á kjötvörum gegn því að fá auknar heimildir til útflutnings til markaða EB.
Þetta er tvíhliða samningur þar sem sömu reglur hljóta að gilda í báðar áttir.
EB hefur alla tíð notað stuðla við mat á útflutningi frá Íslandi á kjöti. Í þessu felst að beinlaust kjöt er reiknað upp með stuðlum til að finna ígildi kjöts með beini.
Kvóti Íslands til EB fyrir kindakjöt var 1.850 tonn á síðasta ári. Þessi kvóti fylltist í byrjun nóvember og varð að stöðva allan útflutning kindakjöts vegna þessa til áramóta. Kvótinn fylltist ekki vegna þess að búið væri að flytja út 1850 tn. Mun minna hafði verið flutt út en vegna þess að beinlaust kjöt var uppreiknað með stuðlum var heildin komin í 1.850 tonn
Það er rangt hjá FA að landbúnaðar- og sjávarútvegsráðuneytið ætli einhliða að skerða innflutning með stuðlum. Um er að ræða gagnkvæma eins framkvæmd af hálfu EB og Íslands þar sem sömu stuðlar eiga að gilda í báðar áttir.
Það er enginn að hafa neitt af neinum heldur er um að ræða samræmda framkvæmd á gagnkvæmum samningi,“ segir Steinþór.
