Angus holdanaut frá NautÍs fædd 2020
Hér er nú kynntur þriðji árgangur Angus-holdanauta frá Nautgriparæktarmiðstöð Íslands á Stóra-Ármóti. Þessir gripir eru eins og fyrri árgangar tilkomnir með innflutningi fósturvísa frá Noregi og því um að ræða sérvalda úrvalsgripi. Innflutningur fósturvísa er ekki einfalt mál og mikið ferli sem til þarf þar sem gætt er ítrustu smitvarna enda er stöðin á Stóra-Ármóti einangrunarstöð í strangasta skilningi þess orðs. Holdanautakynið Aberdeen Angus er óþarft að kynna enda kjötgæði þess rómuð og kjötnýting mjög góð. Kynið hentar vel þar sem áhersla er lögð á nýtingu beitar og gróffóðurs ásamt góðum móðureiginleikum, mjólkurlagni og léttan burð. Það hentar því vel í t.d. blendingsrækt þar sem burðarerfiðleikar eru fremur fátíðir. Við val á fósturvísum til uppsetningar hérlendis hefur frá því Nautgriparæktarmiðstöð Íslands (NautÍs) var stofnuð verið sérstaklega horft til nauta sem gefa góða móðureiginleika til uppbyggingar á Angus-holdagripastofni hérlendis. Á árinu 2018 fæddust kálfar undan Li‘s Great Tigre NO74039 og First Boyd fra Li NO74033 og á árinu 2019 var um að ræða gripi undan Hovin Hauk NO74043 og Horgen Erie NO74029. Á árinu 2020 var eingöngu um að ræða kálfa undan Emil av Lillebakken NO74028. Allt eru þetta naut sem gefa góðar mæður.
Emil av Lillebakken, f. 2. janúar 2009, hjá Jan Håvard Refsethås í Haltdalen í Þrændalögum. Þess má geta í framhjáhlaupi að í Vestmannaeyjum stendur eftirgerð stafkirkjunnar í Haltdalen. Emil er gott alhliða kynbótanaut sem gefur ríflega meðalstóra kálfa með léttan burð, bæði hjá kúm og kvígum, góðan vaxtarhraða, mikinn fallþunga og góða flokkun sem á við um hvort tveggja, holdfyllingu og fituflokkun. Mæðraeiginleikar dætra Emils eru einnig mjög miklir. Til samanburðar við tölur um vöxt gripa á Stóra-Ármóti má nefna að Aberdeen Angus gripir á uppeldisstöðinni á Staur í Noregi voru að vaxa um 1.415-1.669 g/dag við uppgjör í mars 2021. Í þeim hópi voru fjórir synir Emils av Lillebakken. Nautin sem fæddust á Stóra-Ármóti árið 2019 uxu um 1.442-1.842 g/dag frá fæðingu til og með maí 2020. Þegar þetta er skrifað er sæðistaka úr þessum nautum ekki hafin og því liggur ekki fyrir hver árangur úr henni verður. Það er þó von allra sem að verkefninu standa að síðar í sumar standi þessi naut kúabændum til boða við sæðingar um land allt.
