Allt grænmeti er seint á ferðinni

Höfundur: Sigurður Már Harðarson

Allt grænmeti verður frekar seint á ferðinni í ár, en garðyrkjubændur hafa glímt við ýmsar veðurfarslegar áskoranir í sumar.

Helgi Jóhannesson, garðyrkjuráðunautur hjá Ráðgjafarmiðstöð landbúnaðarins, segir að strax í vor hafi víða verið vandkvæðum bundið að hefja ræktun. „Frost í jörðu tafði jarðvinnslu, sáningu og útplöntun. Júní var frekar kaldur og júlí blautur og sólarlítill. Norðanhretið í byrjun júní hafði mest áhrif á Norðurlandi.“

Það sem komst á legg lítur ágætlega út

Helgi segir að mikill vindur í sama hreti hafi hrifið dúka og plastyfirbreiðslur af ökrum á Suðurlandi og valdið tjóni nokkuð víða sem seinkar uppskeru. „Einnig varð tjón hjá kartöflubændum þar sem jarðvegur fauk ofan af útsæði.“

Hann segir að það séu ekki eintóm harðindi og skakkaföll í útiræktuninni í sumar. „Það sem komst á legg lítur ágætlega út og ef seinni hluti sumars verður eðlilegur og sæmilega hlýr ættu menn að ná uppskeru þó líklega verði hún undir meðallagi.“

Nýupptekið gullauga

„Fyrstu kartöflurnar, fljótvaxin yrki ræktuð undir plasti, komu á markað um miðjan júlí og nú erum við farin að sjá nýupptekið gullauga í búðum. Uppskera á öðru grænmeti byrjaði í lok júlí og eðlilegt framboð ætti að verða núna um viku af ágúst sem er viku til 10 dögum seinna en venjulega,“ heldur Helgi áfram.

Óttast var í vor að skæð kartöflumygluafbrigði myndu berast til landsins með innfluttu stofnútsæði, en Helgi segir að enn hafi ekki orðið vart við slík vandamál enn þá.

Kuldi og lítil birta

Halla Sif Svansdóttir Hölludóttir, garðyrkjubóndi á Flúðum, segir að hjá henni hafi kaldar nætur að vissu leyti verið helsta áskorunin. „Hjá mér hefur verið ágætis hlutfall af þurrki og vætu en það er heldur kalt og birtan er af skornum skammti. Finnum líka fyrir því inni í gróðurhúsum að það eru færri sólarstundir þar sem slokknar á lömpunum.

Hluti af uppskerunni hefur sjokkerast í kulda og farið illa og hægt af stað á meðan annað sem fór út yfir góða daga er að koma mjög vel út, en er þó nokkrum dögum seinna en við reiknuðum með.“

Skylt efni: uppskera | grænmeti