Agro­teknikk 2015 í Noregi er paradís fyrir tækjaóða

Það var margt um manninn á stærstu landbúnaðar- og tækja­sýningu Noregs, Agroteknikk, dagana 26.–29. nóvember sem haldin var í Lillestrøm. Aðsóknarmet var slegið á sýningunni, sem var nú haldin í sjöunda sinn, en hátt í 35 þúsund manns komu við þá fjóra daga sem opið var inn á sýninguna. 

 

Fjölbreytninni var fyrir að fara og hér var eitthvað fyrir alla, jafnt fullorðna og börn, sem tækjaóða og hinn almenna borgara. 

 

Agroteknikk var haldið í Norges Varemesse í Lillestrøm í fimm stórum sölum upp á um 40 þúsund fermetra. Þarna voru samankomnir norskir innflytjendur, söluaðilar véla og tækja, bændur, ungt fólk með áhuga á landbúnaði, félagasamtök, landbúnaðarskólar, ráðgjafar, stjórnmálamenn og fjölmiðlar með sérhæfingu á landbúnaði ásamt mörgum fleiri.

 

Tengslanetið mikilvægt

 

Óhætt er að segja að allir hafi fundið eitthvað við sitt hæfi þessa fjóra daga sem sýningin var haldin en þannig var haldin tækninýsköpunarkeppni líkt og fyrri ár þar sem sendar voru inn 107 nýjar hugmyndir, allar góðar og gildar með nýjum nýsköpunarhugmyndum. Lærlingur ársins innan bifvélavirkjunar, með áherslu á landbúnaðartæki, var valinn og á föstudagskvöldinu voru skipulagðir sérstakir „bændur í bæinn“- tónleikar í Oslo Spektrum með rokksveitinni Hellbillies. Á föstudeginum var einnig hægt að fá faglega upprifjun og ráðgjöf á fjósbyggingum, vélbúnaði innandyra, véltækni ásamt fóðurráðgjöf og skipulag í mjólkurframleiðslunni. Prjónadúettinn Arne og Carlos voru einnig á sýningunni og buðu upp á vinnustofu fyrir prjónaþyrsta sem vakti mikla lukku.

 

Samdóma álit var frá sölu­mönnum sem stóðu vaktina á Agroteknikk að aldrei hefði sýningin heppnast jafnvel og fannst þeim áberandi hversu margir voru í fjárfestingahugleiðingum og voru vel inni í nýjustu tækni og tækjum. Forsvarsmenn sýningarinnar tóku eftir því að meira var um yngra fólk nú en áður og fannst það jákvætt merki fyrir landbúnaðinn. Þar að auki er slík sýning gríðarlega mikilvæg fyrir aðila til að byggja upp tengslanet sín við bændur og einnig milli söluaðila og framleiðenda.