30.500 tonn af malbiki
Áætlað er að leggja út 200.000 fermetra af malbiki í tengslum við malbikun við nýja Ölfusárbrú, eða um 30.500 tonn af malbiki, og fer stór hluti þess á hringveginn um Suðurlandsveg.
Umræddur kafli, sem er um 60.000 fermetrar, verður byggður upp í þremur malbikslögum og er gert ráð fyrir að nota um 27.000 tonn af malbiki á þann kafla. Þá eru um 20.000 fermetrar af hliðarvegum, göngustígum og öðru sem tengist framkvæmdinni og fara um það bil 4.000 tonn af malbiki í þá gatnagerð.
330 metra ný Ölfusárbrú
Verkefnið „Hringvegur um Ölfus“ snýr að byggingu 330 metra langrar brúar, nýs 3,7 kílómetra hringvegar, auk um eins kílómetra af öðrum tveggja akreina vegum. Gerð verða ný vegamót austan Selfoss, undirgöng undir hringveg fyrir gangandi, hjólandi og hestamenn ásamt undirgöngum fyrir bíla og gangandi. Markmiðið með framkvæmdunum er að auka afkastagetu hringvegarins og að aðskilja akstursstefnur og bæta umferðaröryggi.
„Hringvegur um Ölfus“
Fyrirtækið Óskatak og Colas Ísland hafa undirritað verksamning um að Colas sjái um malbikun við nýja Ölfusárbrú. Óskatak er undirverktaki ÞGverk og sem slíkt sér félagið um jarðvegsframkvæmdir verkefnisins, þar með talið gatnagerð í verkefninu. Bygging nýrrar brúar yfir Ölfusá er hluti af verkefni Vegagerðarinnar sem ber yfirskriftina „Hringvegur um Ölfus“. Verkefnið snýst um að færa hringveginn út fyrir þéttbýli Selfoss. Óskatak kemur til með að sjá um gatnagerðarhluta verkefnisins en Colas sér um að leggja út malbikið.
„Við fögnum því mjög að halda áfram góðu samstarfi við Óskatak, sem byggst hefur upp undanfarin ár. Enn fremur að fá að taka þátt í einu mest spennandi verkefni undanfarinna ára á þjóðvegakerfi okkar undir styrkri stjórn ÞG, sem er aðalverktaki verksins,“ segir Sigþór Sigurðsson, framkvæmdastjóri Colas.
