Aldarafmæli Láru Brynhildar
Lára Brynhildur Eiríksdóttir, sem býr á hjúkrunarheimilinu Lögmannshlíð á Akureyri, fagnaði 100 ára afmæli sínu 21. október síðastliðinn. Lára ólst upp í stórum systkinahóp en alls voru systurnar fimmtán, enginn bróðir.
Lára Brynhildur og ein önnur systranna eru lifandi í dag. Lára á sjálf 34 afkomendur og er hún orðin langalangalangamma. Afmælisbarnið er fætt og uppalið í Reykjavík en flutti til Akureyrar 2002 til að vera hjá dóttur sinni.
Hefur gaman af lífinu
Lára Brynhildur er mjög lífsglöð og alltaf kát og hefur aldrei reykt eða drukkið áfengi. „Já, já, ég hef mjög gaman af lífinu og nýt þess að vera til. Það er hugsað einstaklega vel um mig hér í Lögmannshlíð og hér er stórgott að vera. Ég er dugleg í handavinnu ýmiss konar og svo fylgist ég alltaf með fréttum,“ segir Lára Brynhildur.
Hún er líka á samfélagsmiðlum eins og Facebook. „Já, ég er þar en ýti stundum á vitlausa takka, það er allt í lagi, en mér finnst gaman að fylgjast með því sem er að gerast í gegnum Facebook,“ segir hún hlæjandi.
Lára Brynhildur og fjölskylda hennar ólust upp í Reykjavík og voru þar í Sogamýrinni. Hún segir að systurnar hafi alltaf verið mjög góðar vinkonur.
„Já, það vorum við, það var aldrei ósætti og allar vorum við góðar vinkonur, ég man ekki annað. Nú erum við bara tvær á lífi, ég og systir mín í Reykjavík, sem er 92 ára gömul,“ segir Lára.
Ætlar að verða 105 ára
Lára starfaði lengi í Hagkaup í Reykjavík en síðar hjá SÍBS og Reykjalundi. En hvað stefnir hún á að verða gömul? „105 ára, það er stefnan,“ segir hún og skellihlær. Lára Brynhildur á þrjú börn, tvo syni og eina dóttur og búa báðir synir hennar á Selfossi og eru þeir komnir á áttræðisaldur.
Hún fylgist vel með því sem er að gerast, hlustar og horfir daglega á fréttir og hún er einnig dugleg að prjóna, hekla og hlusta á bækur. „Ég er búin að hekla teppi handa öllum mínum afkomendum og svo er ég með heyrnartól og læt lesa fyrir mig. Þessa dagana er ég að kynnast Laxness. Ég hafði hvorki tíma né þroska fyrir það fyrr,“ segir hún hlæjandi. Foreldrar Láru Brynhildar voru þau Sigrún Kristjánsdóttir og Eiríkur Einarsson.
