Vinsamlegast athugið að þetta efni er eldra en 8 ára.
Refshalabragur
Lesendarýni 14. mars 2016

Refshalabragur

Höfundur: Rúnar Kristjánsson
Í þarsíðasta tölublaði Bænda­blaðsins var ­mik­­ill pistill þar sem Indriði Aðalsteinsson, bóndi á Skjaldfönn við Djúp, lagði út af þingsályktunartillögu. Var þar um að ræða tillögu Róberts Marshall alþingismanns um eflingu rannsókna á vistfræði melrakkans. 
 
Við lestur á þessum mikla pistli varð Rúnari Kristjánssyni að orði:
 
Við refshala ráð sitt binda
rannsóknar teymi gleið.
Vörn þar um varga mynda,
víkja þar hvergi af leið.
Lífsrétti lamba og kinda
leyfa ekki kjörin greið.
Leggja til leiðsögn blinda,
lofandi falskan seið!
 
Makráðar menntahræður
mæna í gegnum rör.
Heimskan þar hugsun ræður,
hyllir öll villusvör.
Andlegar innistæður
eru þar hvergi í för.
Því hefur skolli skæður
skínandi vaxtarkjör!
 
Þarf ekki það að efa,
þar með er stefnt í grand.
Kerfið með krepptum hnefa
kýlir svo margt í strand.
Sérfræðin sést þar vefa
svikræðis vistarband.
Sælulíf radíó-refa
rækta skal vítt um land!
 
Eykur á meinsemd marga
myglunnar kerfishús.
Hjörðin sem ver þar varga
villunni þjónar fús.
„Refum er ráð að bjarga,
rétt eins og smæstu lús.“
Dómsorð þau djarft vill garga
dulítil hagamús!
 
Vargsháttur villukerfa
víst er þeim fylgja þjál.
Fast mun að sveitum sverfa,
syrta um strönd og ál.
Æðarvarpsbændur erfa
alls konar vandamál.
Rjúpur í refinn hverfa,
rándýrin léku á Pál!
 
Lögmál er ljótt að brjóta,
leiður er varga þys.
Eitt vill þar öðru hóta,
allt fer þar góðs á mis.
Lífkeðjan heill mun hljóta
hendi hana ekki slys.
Náttúran þarf að njóta
nærandi jafnvægis!
 
Býður ei lausnar lykla
lyginnar flækjusvar.
Spóla þó víða og sprikla
sponsaðir aumingjar.
Þarf ekki um stórt að stikla,
stefnt er til bölvunar.
Marshall-aðstoðin mikla
mælist á núlli þar!
Lýsingar enginn ýkir
af því sem reyndin ber.
Rétthugsun svikul sýkir
samfélagsandann hér.
Þingmenn af þótta ríkir
þvaðra og dilla sér,
dýrbítum ljótum líkir,
leggjast á hvað sem er!
 
Íslenskir vargavinir,
vábeiður kvikusands,
verða aldrei vaxtarhlynir,
vindhanar hrokastands.
Hugar og hæfnislinir
halda þeir beint til grands,
hálfu verri en hinir
heimskingjar þessa lands!
 
Sérfræði sumra manna
sjálfkrafa vinnur spjöll.
Skynsemin skýra og sanna
skelfist þar dæmin öll.
Er milli allra tanna
andsetin kerfishöll.
Mótmæli sveina og svanna
svelli um Austurvöll!
 
Rúnar Kristjánsson 
(Ort að kveldi 12.2.2016 eftir lestur góðrar greinar I.A. í Bændablaðinu) 
Við og sauðkindin
Lesendarýni 28. mars 2024

Við og sauðkindin

Sauðkindin hefur verið hluti af menningu okkar og gaf okkur margt af því sem þur...

„Stórborgarelítan hefur hunsað bændur of lengi“
Lesendarýni 27. mars 2024

„Stórborgarelítan hefur hunsað bændur of lengi“

Þannig mæltist Camillu Cavendish, dálkahöfundi Financial Times (FT), þann 24. fe...

Landbúnaðarandúð
Lesendarýni 26. mars 2024

Landbúnaðarandúð

Fjölþátta ógnir steðja að íslenskri matvælaframleiðslu sem þó koma flestar úr sö...

Bændur, norskir víkingar og sjálfbær landnýting
Lesendarýni 25. mars 2024

Bændur, norskir víkingar og sjálfbær landnýting

Eins langt aftur og Íslandssagan nær hefur landnýting og búskapur verið órofa he...

Girðingar meðfram vegum
Lesendarýni 25. mars 2024

Girðingar meðfram vegum

Oft eru gáfulegar umræður við kaffiborð í sveitum og þá sérstaklega ef kaffið er...

Hvernig stóð á kúfi dauðsfalla eftir að veiran var að mestu horfin?
Lesendarýni 20. mars 2024

Hvernig stóð á kúfi dauðsfalla eftir að veiran var að mestu horfin?

Mikill fjöldi ótímabærra dauðsfalla á síðustu misserum hefur ekki farið fram hjá...

Þjóðlendukröfur í eyjar og sker
Lesendarýni 14. mars 2024

Þjóðlendukröfur í eyjar og sker

Óbyggðanefnd tók til meðferðarsvæði 12, með því að fjármálaráðuneytinu var tilky...

Eignaupptaka í nafni sjálfbærrar landnýtingar?
Lesendarýni 13. mars 2024

Eignaupptaka í nafni sjálfbærrar landnýtingar?

Í Samráðsgátt stjórnvalda lágu fyrir skemmstu til umsagnar drög að reglugerð um ...