Spennandi bikarúrslit
Líf, fjör, mikil skipting, baneitruð lega á köflum og gríðarleg spenna einkenndi úrslitaleikinn í Bikarkeppni BSÍ milli sveitar Frímanns Stefánssonar frá Akureyri og Betri ferða. Ekki síst var síðasta lota fjörug þar sem liðin skiptust á að hafa forystu. Var það ekki fyrr en í síðasta spili af alls 48 sem úrslit réðust og höfðu Betri ferðir betur og eru nýir bikarmeistarar.
Spil dagsins úr viðureigninni er til marks um að stundum borgar sig að nota eðlilegt sagnkerfi umfram sterkt lauf sem segir ekkert um skiptingu heldur lofar 16 punktum plús. Vestur var gjafari og NS á hættu.
Þar sem Reynir Helgason og Frímann sátu í AV opnaði sá síðarnefndi á einu hjarta. Júlíus Sigurjónsson í suður meldaði tvö lauf sem gaf Reyni færi á að skjóta inn 2 hjörtum þótt styrkurinn sé ekki mikill. Frímann meldaði 4 hjörtu og fékk að spila þau. 11 slagir eftir vel heppnaða hjartasvíningu. (Glöggir sjá kannski að NS eiga 620 í 4 spöðum en það er hægara sagt en gert að finna þann samning).
Á hinu borðinu opnaði Björn Eysteinsson eftir tvö pöss á sterku laufi. Hann og Guðmundur Sv. Hermannsson spila precision. Það gaf Pétri Guðjónssyni færi á vel heppnaðri hindrun af sverara taginu, hann lagði fjögur lauf á borðið! Pass, pass, pass. 12 impar til sveitar Frímanns.
Vetrarstarfið hafið
Flest bridgefélög hafa nú hafið vetrarstarfsemi sína og verður í flestum þeirra spilað fram í maí. Ekki er óalgengt að spilað sé einu sinni í viku. Starfsemin nær víða um land og er keppnisharka sem í eina tíð einkenndi briddskeppnir víðast á undanhaldi. Nokkur nýliðun hefur orðið í spilamennsku og eru vanir spilarar hvattir til að taka sérlega vel á móti nýju fólki sem þarf ekkert að óttast! Bridgefélög landsins eru fyrir leika sem lærða. Mestu varðar að fólk komi saman í góðum félagsskap og hafi gaman.
