Jólin komu snemma fyrir norðan
Það mátti greina spennu og tilhlökkun í augum Þingeyings sem óðamála sagði umsjónarmanni tíðindi þegar fundum bar saman fyrir skemmstu á Laugaveginum.
„Veistu nú hvað?“ sagði sá þingeyski hraðmæltur. „Það er búið að endurvekja keppnisbriddslífið í Þingeyjarsveit,“ sagði hann og augun ljómuðu af tilhlökkun. „Jólin koma snemma þetta árið,“ bætti hann við.
Hjá forystu Bridge-sambands Íslands varð Matthías Imsland framkvæmdastjóri til svara þegar Briddsþáttur Bændablaðsins kannaði málið betur. Matthías staðfesti að Þingeyingar væru sannarlega komnir aftur af stað í reglulegri keppnisspilamennsku eftir langt hlé. Fylgdi sögunni að menn hygðust uppfæra tól sín og tæki til briddsiðkunar.
Það er ekki á hverjum degi sem svo ánægjulegar fréttir berast af okkar ástkæru hugaríþrótt.
Spila öll fimmtudagskvöld
Með rannsóknarblaðamennsku að vopni settist umsjónarmaður upp í bíl og ók norðaustur til fundar við Harald Bóasson sem leggur hinu endurvakta briddsstarfi Þingeyinga til húsnæði. Um 400 kílómetrum síðar var lagt fyrir utan Dalakofann í Reykjadal. Í héraðsbúðinni, sem jafnframt er veitingastaður, treysta nú þingeyskar briddskempur heit sín í spilinu. Hittast og spila öll fimmtudagskvöld klukkan 20.
„Og það er nú bara þannig að stundum koma menn að spila við okkur alla leið frá Akureyri og jafnvel Dalvík,“ sagði Haraldur og var þá skúbbinu náð!
Umsjónarmaður tók mynd af Halla Bó og Dalakofanum hans.
Kvaddi, þakkaði og ók aftur suður.
Á leiðinni rifjaðist upp að þegar ég var krakki var spilaður bridds í öllum sveitum. Mun sú tíð renna aftur upp?
Mörg jólamót fram undan
Briddsþætti Bændablaðsins er kunnugt um fjögur briddsmót sem fram fara um jól og áramót. BR og BH halda mót að venju á höfuðborgarsvæðinu sem og Bridgefélag Akureyrar. Þá heldur Norðurljósaklúbburinn mót á Internetinu á nýársdag. Nánari upplýsingar á Facebook-síðu BSÍ og bridge.is.
Umsjónarmaður óskar lesendum gleðilegra jóla og áramóta með þökk fyrir gefandi samskipti á árinu sem er að líða!
