Frumkvöðlar í Sjávarklasanum: Hefðarreglur brotnar

Nýlega kom á markað Fish & Chips snakk. „Það er eins og nafnið gefur til kynna, fiskur og kartöflur saman í poka,“ segir Rúnar Ómarsson, eigandi Nordical Foods.

Rúnar segir hugmyndina að snakkinu eiga rætur að rekja til fjallahjólaferða, en hann er búinn að vera fjallahjólaleiðsögumaður í tíu ár. Hann segir að um leið og maður sé orðinn leiður á orkustöngum, sem allar bragðist eins, þá komi upp löngun eftir mat.

„Ég var oft að fá mér lítinn kartöfluflögupoka á morgnana til að fá kolvetni, fitu og smá salt. Svo fór mann að langa í einhverja aðra næringu þegar leið á daginn – þá er líkaminn að biðja um prótein. Þar kemur harðfiskurinn sterkur inn. Hérna er heildarlausn á þessu vandamáli,“ segir Rúnar.

Í staðinn fyrir að vera með djúpsteiktan fisk og franskar kartöflur, þá er snakkið frostþurrkaður þorskur og kartöfluflögur. „Saman er þetta hollara snakk en annað snakk, því eins og allir vita er harðfiskurinn ofurfæða.“ Hann bætir við að þurrkaði fiskurinn sé með 84 prósent prótein og fullt af öðrum næringarefnum, eins og B-12, sínk og joð. Harðfiskurinn er dýr einn og sér og því sé gott að drýgja hann með flögunum. Það sama gerir fólk þegar það eldar fisk, en þá eru oftar en ekki kartöflur til hliðar.

Harðfiskur aldrei kryddaður

Þessi vara segir Rúnar að brjóti ýmsar hefðarreglur, því harðfiskur hefur aldrei verið kryddaður – einungis bragðbættur með smjöri. „Kartöfluflögurnar eru kryddaðar og fiskurinn tekur í sig smá af kryddinu, með því einu að hangsa saman í pokanum.“

Eitt erfiðasta úrlausnarefnið segir Rúnar að hafi verið að láta þessi ólíku efni passa saman. Mjög miklu máli skipti að kartöfluflögurnar og fiskflögurnar séu jafn stökkar. „Annars myndir þú lenda í svokölluðu texture violation, eða áferðaráfalli, því þú getur ekki verið með tvenns konar flögur með mislöngum tyggitíma.“

Í grunninn kartöfluflöguframleiðandi

Hráefnið sem hann notar er íslenskur þorskur unninn af harðfiskversluninni Von. Sjálfur er hann með fullbúna aðstöðu til að framleiða kartöfluflögur. Hann reynir eftir fremsta megni að nota íslenskar kartöflur þegar þær bjóðast. Framboðið af þeim sé þó ekki alltaf stöðugt og jafnframt innihalda íslenskar kartöflur meiri sterkju en erlendar, sem gerir flögugerð erfiðari. „Við byrjuðum sem kartöfluflöguframleiðandi og síðan þróaðist þetta yfir í þetta.“

Snakkið mun fást í völdum Krónuverslunum, ferðamannabúðum eins og Taste of Iceland og Sky Lagoon, og í fríhöfninni. Jafnframt vinnur Rúnar að því að markaðssetja snakkið erlendis, þó enn sé langt í land hvað það varðar.