Uggandi yfir fjölgun úlfa
Fjölgun úlfa í Evrópu er orðin raunveruleg ógn við bændur á meginlandinu.
Úlfahjörðum hefur fjölgað jafnt og þétt í Evrópu á síðastliðnum árum eftir að þeir hlutu lagalega vernd í Evrópusambandslöndunum. Hefur það haft í för með sér að útbreiðsla þeirra er að aukast aftur en til dæmis hefur sést til úlfa bæði í Danmörku og Belgíu sem höfðu ekki sést þar í meira en 150 ár. Eru þeir nú orðin mikil ógn við landbúnað, sérstaklega á ákveðnum svæðum í Evrópu.
Ein af helstu ástæðunum er talin vera sú að endurheimt villtrar náttúru hefur verið víða á stefnuskránni innan Evrópusambandsins. Samkvæmt Kjörlendistilskipuninni frá 1992 og Bernarsáttmálanum frá 1979 hljóta gráúlfar sérstaka vernd (e. strictly protected) og er alla jafna bannað að veiða þá.
Í dag er talið að meira en 20.000 úlfar séu á meginlandi Evrópu og fari ört fjölgandi. Eins og áður sagði var Holland nær laust við úlfa í nokkur hundruð ár en nú finnast þar í landi níu úlfapör sem talið er að hafi komið á legg 39 yrðlingum á síðasta ári. Talið er að á síðasta ári hafi verið um 184 úlfahjarðir í Þýskalandi en um síðustu aldamót er talið að ein úlfahjörð hafi verið þar í landi. Ursula von der Leyen, forseti framkvæmdastjórnar Evrópusambandsins, hefur varað við þeim ógnum sem steðja af fjölgun úlfa í Evrópu. „Styrkur úlfahjarða á sumum svæðum í Evrópu er orðin raunverulega hætta, sérstaklega fyrir búfénað,“ lét hún hafa eftir sér og hefur hvatt bæði ríkisstjórnir og sveitarstjórnir til að grípa til aðgerða eftir því sem þurfa þykir.
Talið er að smáhestur von der Leyen, Dolly, hafi orðið fyrir úlfaárás árið 2022 og málið standi henni því nærri. Þó er ekki um einkaframtak hennar að ræða en bændur víða um álfuna hafa kallað eftir auknum heimildum til að veiða úlfa. Framkvæmdastjórn ESB hefur nú lagt fram tillögu um að lagalegri vernd úlfa verði breytt þannig að bændur og sveitarstjórnir fái aukin réttindi þegar kemur að því að verja búfénað sinn. Talsfólk endurheimtar villtrar náttúru hafa mælt með því að í stað þess að breyta lagalegri vernd úlfa eigi bændur að þétta rafmagnsgirðingar sínar.
