Syðri -Gróf 2
Axel hefur haft annan fótinn í Syðri-Gróf allt sitt líf. Fyrst hjá ömmu sinni og afa sem keyptu jörðina 1961, svo hjá móðurbróður sínum.
Axel og Elísabet Thorsteinson keyptu svo jörðina af honum, Bjarna Pálssyni, og tóku alveg við búrekstrinum 1. janúar 2021.
Býli: Syðri-Gróf 2.
Staðsett í sveit: Flóahreppi í Árnessýslu, Villingaholtshreppi hinum forna.
Ábúendur: Axel Páll Einarsson og Elísabet Thorsteinson.
Fjölskyldustærð (og gæludýra): Við hjónin ásamt þremur börnum; Lilja María, 10 ára, Páll Axel, 7 ára og Guðmundur Bjarki, 10 mánaða, tíkurnar Táta og Týra, einn fressköttur og læða með kettlinga.
Stærð jarðar? Rúmir 200 hektarar.
Gerð bús? Blandað bú, mjólkurkýr, kindur, hross, hænur, nokkrar geitur og angóra kanínur.
Fjöldi búfjár og tegundir? 28 árskýr ásamt ungneytum, 130 kindur og 23 hross. Erum einnig með hross í hagagöngu fyrir aðra.
Hvernig gengur hefðbundinn vinnudagur fyrir sig á bænum? Fyrst er nú að reyna að koma börnum af stað í skólann, gengur misvel. Svo eru mjaltir, gjafir og aðrar gegningar fram að morgunkaffi.
Í morgunkaffi eru heimsmálin rædd og plön framtíðar, það getur stundum teygt sig fram að hádegi. En auðvitað fara dagleg störf eftir árstíðum hér eins og annars staðar. Endum svo „yfirleitt“ á kvöldmjöltum.
Skemmtilegustu/leiðinlegustu bústörfin? Maður á aldrei að ganga í vinnu með það hugarfar að hlutir séu leiðinlegir, en vissulega eru sum störf þreytandi.
Skemmtilegustu bústörfin eru auðvitað mjaltir (Axel) og útreiðar (Elísabet).
Hvernig sjáið þið búskapinn fyrir ykkur á jörðinni eftir fimm ár? Svipaðan, nema stefnum á að hafa kýrnar í lausagöngu, svo væri reyndar gaman að mála útihúsin.
Hvar teljið þið að helstu tækifærin séu í framleiðslu íslenskra búvara? Tækifærin eru í hreinleikanum.
Hvað er alltaf til í ísskápnum? Mjólk! Ef hún er ekki til, þá er fokið í öll skjól.
Hver er vinsælasti maturinn á heimilinu? Steikt lambakjöt er alltaf gott, svo eru börnin alveg vitlaus í lifrarpylsu.
Eftirminnilegasta atvikið við bústörfin? Þegar við héldum upp á þrítugsafmælið hennar Elísabetar í fjárhúsinu með pomp og prakt, það var rosagaman í nýuppgerðu fjárhúsi. Reyndar var sauðfjárbúskapurinn allur í heild sinni mjög eftirminnilegur þetta ár, mjög gaman.
