Vinsamlegast athugið að þetta efni er eldra en 7 ára.
Stefnir í mjög góða uppskeru eftir gott sumar
Mynd / Margrét Þóra Þórsdóttir
Fréttir 6. október 2014

Stefnir í mjög góða uppskeru eftir gott sumar

Höfundur: Margrét Þóra Þórsdóttir

 „Við erum rétt aðeins að byrja að taka upp og uppskeran lofar góðu. Mér sýnist að hún muni vera álíka mikil og í fyrrahaust, en þá fengum við mjög góða uppskeru,“ segir Friðjón Þórarinsson, bóndi á Flúðum á Fljótsdalshéraði, en bærinn er skammt norðan Egilsstaða.

Þar stunda Friðjón og Anna Bragadóttir rófnarækt á hálfum ha lands. Þá eru þau með um 230 vetrarfóðraðar kindur, stunda skógrækt á 40 ha, leigja út sumarhús og stunda að auki vinnu utan heimilis.

Safna liði úr röðum vina og vandamanna við upptökuna

Anna og Friðjón stefna að því að hefja upptökustörfin fyrir alvöru um næstu mánaðamót. Þau fá til liðs við sig góðan hóp vina og ættingja og leggjast allir á eitt við rófuupptökuna. „Þetta er fjölskylduvænt verkefni, hingað koma vinir og vandamenn og aðstoða okkur,“ segir Anna. Hún segir að þau reyni að draga upptöku eins lengi og hægt er fram á haustið svo rófurnar geymist betur. Engar vélar eru notaðar við upptöku, allt tekið upp með höndunum „og það gengur mjög vel þegar margir taka þátt“.

Rófurækt hefur verið stunduð á Flúðum um árabil og segir Friðjón að landið henti vel til slíkrar ræktunar. Hins vegar gangi erfiðlega að rækta þar kartöflur þar sem iðulega myndast frostpollur neðan bæjarins. „Við höfum prófað að rækta kartöflur hérna, það gengur ekki, en við erum með lítils háttar kartöflurækt á Setbergi,“ segir hann.

Góð uppskera í fyrra og stefnir í annað eins nú

Friðjón segir fáa bændur á Austurlandi stunda rófnarækt og enginn með mikla ræktun. „Það kom sér vel hversu mikil uppskera varð í fyrrasumar, því lítil rófuuppskera var í öðrum landshlutum vegna vætutíðar.“ Alls fengu þau Anna og Friðjón um 9 tonn af rófum upp úr garði sínum í fyrrahaust sem er með mesta móti. Þau eru rétt að byrja upptöku á þessu hausti og segja uppskeru lofa mjög góðu, hún verði síst lakari en metárið í fyrra. „Rófurnar eru stærri í ár, svo að líkindum gætu tonnin orðið fleiri en í fyrra,“ segir hann.

Uppskeran er að mestu seld á heimamarkaði, í verslanir á Egilsstöðum og þá er mötuneyti álvers Alcoa á Reyðarfirði stór kaupandi. Eins hefur fólk mætt heim á hlað og keypt rófur í poka.

Æ fleiri prófa kornrækt

Friðjón, í félagi við þrjá bændur aðra, var með kornrækt á 8 ha lands á jörðinni Setbergi og á Helgafelli. Búið er að þreskja og var uppskera mjög góð. Áður hefur Friðjón í litlum mæli stundað kornrækt, en hann segir bændur á Austurlandi vera að færa sig upp á skaftið og æ fleiri prófi nú að rækta korn á jörðum sínum. „Þetta er að aukast núna hin síðari ár, en var svo til óþekkt hér áður fyrr,“ segir hann. Einstaklega gott veður frá því í vor og langt fram á haust á sinn þátt í hversu vel bændur austan til á landinu uppskera.

Sauðfé og skógrækt

Anna og Friðjón eru með sauðfé, 230 vetrarfóðraðar kindur á húsi og þá hófu þau snemma skógrækt á vegum Héraðs- og Austurlandsskóga. Riða greindist á bænum fyrir allmörgum árum og í kjölfar niðurskurðar sneru þau sér að skógrækt á hluta jarðarinnar, en hún var fjárlaus um tveggja ára skeið. Alls rækta þau skóg á um 40 ha landi. „Auðvitað má alltaf deila um hvort það land sem tekið er undir skógrækt nýtist ef til vill betur undir eitthvað annað. Skógræktin hefur tekist vel hér og við erum aðeins byrjuð að grisja,“ segir Friðjón.

Nýta allt sem jörðin gefur

Anna bætir við að þau reyni að nýta allt sem jörðin gefur, tínd eru ber og sveppir til heimilis, að auki bjóða þau gistingu í tveimur sumarhúsum. Nýting hefur verið svipuð og undanfarin sumur, en einkum eru það erlendir ferðamenn sem gista að Flúðum. „Það má eiginlega segja að búskapurinn hér sé því mjög blandaður,“ segir hún. Og bætir við að eitt sinn hafi þau rekið handverksmarkað við bæinn og þar hafi einnig í eina tíð verið svín og geitur. „Við höfum prófað ýmislegt,“ segir hún.

Sláturfélag Vopnfirðinga boðar verulegar afurðaverðshækkanir
Fréttir 27. júní 2022

Sláturfélag Vopnfirðinga boðar verulegar afurðaverðshækkanir

Sláturfélag Vopnfirðinga boðar umtalsverðar hækkanir á afurðaverði til sauðfjárb...

„Viðnámsþróttur þjóða byggir á öflugri innlendri matvælaframleiðslu“
Fréttir 14. júní 2022

„Viðnámsþróttur þjóða byggir á öflugri innlendri matvælaframleiðslu“

Stjórn Bændasamtakana telur skýrslu og tillögur Spretthóps, sem lagaðar voru fyr...

Spretthópur leggur til 2,5 milljarða króna stuðning
Fréttir 14. júní 2022

Spretthópur leggur til 2,5 milljarða króna stuðning

Spretthópur, sem matvælaráðherra skipaði vegna alvarlegrar stöðu í matvælaframle...

Mjólkurvörur frá Örnu til Bandaríkjanna
Fréttir 13. júní 2022

Mjólkurvörur frá Örnu til Bandaríkjanna

Nýlega skrifuðu forsvarsmenn Örnu í Bolungarvík og forsvars- menn Reykjavík...

Samdráttur í sölu á fræi
Fréttir 8. júní 2022

Samdráttur í sölu á fræi

Samkvæmt lauslegri könnun Bændablaðsins er búið að flytja inn rúm tvö tonn a...

Aðstaða bænda og fyrirtækja í landbúnaði á Íslandi er lakari en í öðrum ríkjum Evrópu
Fréttir 8. júní 2022

Aðstaða bænda og fyrirtækja í landbúnaði á Íslandi er lakari en í öðrum ríkjum Evrópu

Rúmlega tuttugu íslensk fyrirtæki sem tengjast landbúnaði og matvælaframleiðslu ...

Spretthópur skipaður til að bregðast við afkomuvanda bænda
Fréttir 3. júní 2022

Spretthópur skipaður til að bregðast við afkomuvanda bænda

Tilkynnt var um það á vef matvælaráðuneytisins í morgun að Svandís Svavarsdóttir...

Orkuframleiðsla með kolum jókst um 18%
Fréttir 2. júní 2022

Orkuframleiðsla með kolum jókst um 18%

Þrátt fyrir allt tal um að draga verði úr losun koltvísýrings (CO2) þá jókst not...