Markaðsstofan Icelandic Lamb 5 ára

Höfundur: Hafliði Halldórsson framkvæmdastjóri Icelandic Lamb & verkefnastjóri hjá BÍ

Um sl. áramót fagnaði markaðsstofan Íslenskt lambakjöt (e. Icelandic Lamb) fimm ára starfsafmæli. Starfinu er ætlað að stuðla að auknu virði afurða sauðfjárræktarinnar. Megnið af starfi fyrstu fimm áranna hefur snúist um ferðamannamarkað.

Starfsemin hefur gagnast veitingageiranum og ferðaþjónustu og aukið sýnileika lambakjöts verulega. Lamb er uppáhalds íslenska afurðin á diskum ferðamanna, í áherslum markaðsstofunnar er sagan sögð og hágæða hráefnið kynnt sem sjálfsagður partur af íslenskri matarupplifun. Samstarf við veitingamenn og valdar sérverslanir er lykilatriði í því að upplýsa kröfuharða neytendur um íslenskt lambakjöt þar sem merki og markaðsefni í enskri og einnig íslenskri útgáfu er í forgrunni.

Gallup hefur sl. fimm ár mælt áhrif markaðsherferðarinnar og neyslu hópsins á íslensku kjöti, fiski og mjólkurvörum. Könnun í júlí sl. sýndi stökk í neyslu hópsins á flestum íslenskum háenda afurðum. Lambið trónar sem fyrr á toppnum með hæstu mælinguna frá upphafi, þorskur, skyr og lax fylgdu fast á eftir. Neysla ferðamanna hefur samkvæmt þessu aukist um 15% frá 2017. Fylgni í þekkingu á merki Icelandic Lamb við neyslu hópsins er skýr og er ljóst að markaðssetning og samstarfsverkefni markaðsstofunnar hafa náð góðum árangri.

Lykiltölur:
67,5% svarenda borðuðu lambakjöt í heimsókninni.

76% svarenda sem þekktu Icelandic Lamb merkið borðuðu lambakjöt í heimsókninni, en neysla hópsins sem EKKI þekktu merkið var 20% lægri. M.ö.o., 20% fleiri velja lamb þegar IL hefur náð til þeirra með blöndu af auglýsingabirtingum og samstarfi við veitingahús.

84% þeirra sem þekkja merkið sáu skjöld Icelandic Lamb á t.d. veitingahúsi.

Lengi vel hafði fjöldi veitingamanna töluverða minnimáttarkennd fyrir því sem að utan kom, sást yfir tækifærin sem blöstu við. Ekki misskilja mig, erlend áhrif eru líka jákvæð og af þeim má margt læra, t.d. virðingu framleiðenda og matvælavinnslu fyrir hráefnum og hefðum sem tilheyra stað og stund. En flestir skilja nú að erlendir gestir sækja í staðbundið hráefni og vilja heyra söguna að baki. Spænskir tómatar á Flúðum, hollenskur kálfur á Sauðárkróki og sænsk síld á Fáskrúðsfirði felur afar takmarkaða sögu í sér fyrir viðskiptavini. Virðið felst í að halda því sögu og menningu að gestum og magna upp jákvæða upplifun og virði þjónustunnar. Smæðina má líka nýta sem styrkleika. Nýtum meðbyr, leggjum af þá minnimáttarkennd sem enn finnst, og vinnum að því að auka virði okkar íslensku afurða, lambakjöts sem annarra, á öllum stigum keðjunnar.