Vinsamlegast athugið að þetta efni er eldra en 4 ára.
Tveggja prósenta aukning var í sölu á íslensku alifuglakjöti.
Tveggja prósenta aukning var í sölu á íslensku alifuglakjöti.
Mynd / Bbl
Fréttir 6. febrúar 2020

Sala á íslensku kjöti jókst lítillega árið 2019 þrátt fyrir verulega fækkun ferðamanna

Höfundur: Hörður Kristjánsson

Heildarsala á kjöti frá bændum á Íslandi jókst um 0,6% á árinu 2019, en alls seldust nærri 29.000 tonn á árinu. Þetta gerist þrátt fyrir afar litla fjölgun landsmanna, eða um 0,015%, sem er 57 manns og 13,8% fækkun ferðamanna. 

Samkvæmt tölum frá starfsfólki í atvinnuvega- og nýsköpunarráðuneyti, sem áður tilheyrði Búnaðarstofu, var um að ræða 2% aukna sölu á íslensku alifuglakjöti. Þá var um 0,9% aukning í sölu á nautakjöti og veruleg aukning í sölu hrossakjöts, eða um 23,1%.

Örlítill samdráttur var í sölu á sauðfjárafurðum, eða um 0,1%, og um 2,9% samdráttur var í sölu á svínakjöti.

Ætla mætti að sala á íslenskum kjötvörum gæti verið talsvert meiri ef litið er á sívaxandi innflutning á kjöti. Fróðlegt verður að fylgjast með kjötinnflutningi á nýbyrjuðu ári í ljósi heimilda í lögum til að flytja inn ferskar og ófrystar kjötvörur.

Á síðasta ári jókst innflutningur á kjöti um 22,4% samkvæmt tölum Hagstofu Íslands um innflutning frá desember 2018 til nóvember 2019. Í heild voru flutt inn tæp 4.400 tonn af kjöti sem samsvarar hátt í allri innanlandsframleiðslu á nautakjöti.

Um 7,3% samdráttur í framleiðslu á sauðfjárafurðum

Samkvæmt tölum frá afurðastöðvum var heildarframleiðsla á kjöti á árinu 2019 samtals tæp 31.753 tonn. Þar var mest framleitt af sauðfjárafurðum, eða rúmlega 9.719 tonn, sem er reyndar 7,3% samdráttur frá 2018. Þá kom alifuglakjöt, en af því voru framleidd um 9.589 tonn sem er aukning upp á 1,1% á milli ára. Svínakjöt var í þriðja sæti með um 6.534 tonn, en þar varð samdráttur í framleiðslu upp á 3,9%. Í fjórða sæti var framleiðsla á nautgripakjöti sem nam um 4.826 tonnum sem er aukning upp á 1,1%. Hrossakjötsframleiðslan var svo í fimmta sæti með um 1.085 tonn, en þar var 15,6% aukning í framleiðslu.

Alifuglakjötið er með mesta markaðshlutdeild

Hlutdeild kjöttegunda á markaðnum er óbreytt milli ára. Þar trónir salan á alifuglakjöti á toppnum með tæp 9.797 tonn og 33,8% markaðshlutdeild. Í öðru sæti voru sauðfjárafurðir með tæp 7.100 tonn og 24,5% markaðshlutdeild, en sala á þeim afurðum miðast við sölutölur frá afurðastöðvum. Í þriðja sæti með 22,5% markaðshlutdeild var svínakjöt, en af því voru seld um 6.530 tonn. Þá voru seld um 4.818 tonn af nautgripakjöti sem er með 16,6% markaðshlutdeild. Hrossakjötið er með 2,5% markaðshlutdeild og sölu upp á rúm 735 tonn.

Um 30% samdráttur í útflutningi kindakjöts

Þegar rýnt er nánar í sölutölur og birgðastöðu á sauðfjárafurðum kemur í ljós að útflutningur hefur dregist saman um 30% frá fyrra ári og var 2.658 tonn. Þá hafa birgðir verið að lækka umtalsvert, eða um 13% 2018 og um 7,2% á árinu 2019. Um 88,4% af kindakjötinu á markaðnum var dilkakjöt, en ærkjöt var 10,6%. Þá var kjöt af veturgömlu 0,4% og kjöt af fullorðnum hrútum var 0,7%.

Enginn útflutningur hefur verið á nautakjöti, svínakjöti og alifuglakjöti. Hins vegar hefur í gegnum árin verið einhver útflutningur á hrossakjöti og þá einkum til Japans. Á síðasta ári voru flutt út um 321 tonn af hrossakjöti, sem var 14,1% samdráttur frá árinu 2018.

Framboð af folaldakjöti hefur aukist um nær 30%

Á síðasta ári nam heildarsalan á hrossakjöti um 735 tonnum. Þar af voru 427,2 tonn af folaldakjöti sem er 29,6% aukning milli ára. Ástæðuna fyrir auknu framboði af folaldakjöti má að öllum líkindum rekja til aukinnar ræktunar á blóðmerum, en blóð er tekið úr fylfullum merum  og selt til lyfjaiðnaðarins.

Auk folaldakjöts voru seld tæp 302 tonn af fullorðnum hrossum sem er 17,1% aukning frá 2018. Hins vegar voru einungis seld tæp 6,3 tonn af trippakjöti, sem var 38,8% samdráttur frá fyrra ári.

Folaldakjötið er með mesta markaðshlutdeild í þessum geira, eða 58,1%. Þá kemur hrossakjöt með 41% hlutdeild og trippakjöt með 0,9% hlutdeild. 

Halla tekur upp Íslenskt staðfest
Fréttir 28. mars 2024

Halla tekur upp Íslenskt staðfest

Halla Sif Svansdóttir Hölludóttir, garðyrkjubóndi og eigandi Sólskins grænmetis ...

Uppfærsla á stefnumörkun Bændasamtaka Íslands
Fréttir 27. mars 2024

Uppfærsla á stefnumörkun Bændasamtaka Íslands

Fjölmörg mál voru til afgreiðslu á nýliðnu Búnaðarþingi 2024, úr fimm nefndum, s...

Endurnýting heimil til 1. nóvember 2025
Fréttir 27. mars 2024

Endurnýting heimil til 1. nóvember 2025

Matvælaráðuneytið hefur tilkynnt um frestun á gildistöku banns við endurnýtingu ...

Horfið frá framleiðslutengdum stuðningi
Fréttir 27. mars 2024

Horfið frá framleiðslutengdum stuðningi

Fyrirkomulag landbúnaðarstuðningskerfis á Íslandi mun taka miklum breytingum ef ...

Hyggur á slátrun í haust ef leyfi fæst
Fréttir 26. mars 2024

Hyggur á slátrun í haust ef leyfi fæst

Fyrrverandi sláturhússtjóri á Vopnafirði ætlar ekki að láta deigan síga þrátt fy...

Niðurskurði lokið á fé úr Blöndudal
Fréttir 26. mars 2024

Niðurskurði lokið á fé úr Blöndudal

Niðurskurður á sauðfé frá bæjunum Eiðsstöðum og Guðlaugsstöðum í Blöndudal fór f...

Kornræktarfélag gengur í endurnýjun lífdaga
Fréttir 26. mars 2024

Kornræktarfélag gengur í endurnýjun lífdaga

Kornræktarfélag Suðurlands verður endurvakið sem viðskiptavettvangur ræktenda og...

Grípa þarf tækifærin
Fréttir 26. mars 2024

Grípa þarf tækifærin

Forseti Íslands, Guðni Th. Jóhannesson, telur að bændur eigi að leyfa sér að hor...