Mynd/Mennta- og menningamálaráðuneytið Tilkynnt um friðunina á Bifröst, talið frá vinstri: Vilhjálmur Egilsson, fyrrverandi rektor á Bifröst, Margrét Jónsdóttir Njarðvík, nýr rektor á Bifröst, sem tók við 1. júní, Lilja Alfreðsdóttir mennta- og menningarmálaráðherra og Reynir Ingibjartsson, f
Fréttir 22. júní 2020

Byggingar Samvinnuskólans á Bifröst friðlýstar

Magnús Hlynur Hreiðarsson
Lilja Alfreðsdóttir mennta- og menningarmálaráðherra hefur, að fenginni tillögu Minja­stofnunar Íslands, ákveðið að friðlýsa elsta hluta skólabygginga Samvinnuskólans á Bifröst í Borgarfirði. 
 
Friðlýsingin tekur til ytra borðs samkomuhúss frá 1950, veggfastra innréttinga í samkomusal og setustofu samkomuhúss, ytra borðs tengigangs milli samkomuhúss og gistiálmu og veggmyndar á tengigangi eftir Hörð Ágústsson listmálara.
 
„Samkomuhúsið á Bifröst er mikilvægt og vel varðveitt dæmi um höfundarverk Sigvalda Thordarson og samstarfsmanna hans, Gísla Halldórssonar og Kjartans Sigurðarsonar, frá upphafsárum þeirra starfsferils. Ekki síst á það við innréttingar og búnað í samkomusal og setustofu, sem varðveist hefur í nær upprunalegri mynd allt til dagsins í dag,“ segir Lilja. 
 
Samkomuhúsið var elsta bygg­ing­in á Bifröst, þá samkomu- og veitinga­staður í eigu Sambands íslenskra samvinnufélaga, þegar Samvinnu­skólinn flutti þangað í land Hreðavatns í Norðurárdal árið 1955. Skólinn hafði þá áður verið til húsa á Sölvhólsgötu í Reykjavík þar sem nú eru skrifstofur mennta- og menningarmálaráðuneytisins. Þegar Samvinnuskólinn tók við samkomuhúsinu var svo reist við það viðbygging með tengigangi, þrílyft heimavistarálma, teiknuð af Skúla H. Norðdahl. Saman mynda húsin tvö fallega og samræmda heild sem hefur einkennt ásýnd Bifrastar og verið táknmynd þeirra skólastofnana sem þar hafa starfað.