Vinsamlegast athugið að þetta efni er eldra en 4 ára.
Níu manna Rússi með 113 hestafla vél. Rússajeppi sem skráður er fyrir hópferðaleyfishafa fellur undir 5% vörugjald og kostar því kr. 2.750.000.- án vsk.
Níu manna Rússi með 113 hestafla vél. Rússajeppi sem skráður er fyrir hópferðaleyfishafa fellur undir 5% vörugjald og kostar því kr. 2.750.000.- án vsk.
Mynd / HLJ
Á faglegum nótum 21. ágúst 2019

Rússinn er kominn til að hrella túttujeppana

Höfundur: Hjörtur L. Jónsson
Í síðasta tölublaði Bændablaðsins var lítil frétt um að fyrirtækið UAZ Iceland hefði hafið innflutning á Rússajeppum. Fleiri en einn aðili hafði samband við mig og spurði hvort ekki stæði til að prufukeyra gripinn.
 
Þann 8. ágúst áttum við hjónin brúðkaupsafmæli og fannst mér vel við hæfi að bjóða konunni, Sunnu Sveinsdóttur, í bíltúr á rússneskri „limmósínu“.
 
Eysteinn Yngvason hjá UAZ Iceland ehf. lánaði mér bílinn til prufuaksturs. Jeppinn er fyrri af tveimur sem hann hefur flutt inn og er skráður sem „smárúta“ og þarf því aukin ökuréttindi til að keyra hann. 
 
Áður en ég ók af stað spjallaði ég lítillega við Eystein, innflytjanda bílanna, um tollflokka og notkunarsvið Rússajeppans. Hann sagði mér að bílarnir féllu í raun undir þrjú mismunandi vörugjöld, allt eftir notkunarflokki þegar þeir eru skráðir. „Tíu sæta UAZ 2206 sem skráður er fyrir hópferðaleyfishafa fellur undir 5% vörugjald og kostar því kr. 2.750.000.- án vsk. Sendibílsútgáfan er aðeins ódýrari í innkaupum en hann fellur undir 13% vörugjald og kemur því út á svipuðu verði og 10 sæta bíllinn. Bíll til einkanota fer í 65% vörugjaldsflokk en verðið er breytilegt eftir hvaða útfærslu menn velja,“ sagði Eysteinn. 
 
Öflugri vél í nýja Rússanum
 
Eftir spjallið fór ég heim á bílnum og bauð konunni í brúðkaupsafmælisrúnt. Við hjónin ókum um Reykjavík með auka rúnti malarveginn upp að Elliðavatni. Sé tekið mið af þeim fjölmörgu Rússajeppum sem voru á götunum fyrir um 10–50 árum er útlitið svipað og nánast óbreytt, en munurinn er mikill. Það fyrsta sem ég tók eftir var krafturinn í vélinni, en gamla vélin var eitthvað rétt yfir 70 hestöfl, en nú er vélin orðin 113 hestöfl og skilar jeppanum fljótt og örugglega upp í umferðarhraða. Það sem vakti samt mesta athygli hjá mér á meðan ég keyrði bílinn var hvað margir horfðu á eftir honum. Þegar var stoppað voru margir sem spurðu út í gripinn.
 
Prufuaksturinn kom á óvart
 
Að keyra bílinn kom mér svolítið á óvart, að vísu er svolítið langt á milli gíra þegar skipt er um gír og þá sérstaklega þegar sett er í 5. gír. Þá þarf maður að halla sér til hægri og setja fram í gírinn. Þrátt fyrir að langt sé á milli gíra þá rennur hann vel í gírana og ekkert óþægilegt að skipta honum. Bremsur eru mun betri en í gamla bílnum og fjöðrunin er margfalt betri. Við hjónin vorum sammála um það að margir bílar sem við höfum verið í hafi verið miklu leiðinlegri á malarvegi og til að hrósa bílnum enn frekar heyrðist ekkert malarhljóð undir bílnum. Hins vegar vorum við sammála um að bílstjórasætið og farþegasætið fremst í bílnum væru óþægilegustu sætin í bílnum en hin átta sætin fyrir aftan væru mun betri í þessari „rússnesku rútu“.
 
Gott bil er á milli sæta og olnbogarými mikið fyrir farþega aftur í bílnum.
 
Bíllinn er örlítið breyttur og með nokkrum aukahlutum
 
Þegar horft er undir bílinn þá er það fyrsta sem maður rekur augun í að fjaðrablöðin eru ekki nema þrjú (voru 13 á gamla). Hásingin virðist líta eins út og á þeim gamla og svo er komin ballansstöng að framan. Allt þetta gerir bílinn betri í akstri. Til að hægt væri að flytja bílinn inn til landsins þurfti hann smávægilegar breytingar á vél svo að hann uppfyllti evrópska staðla í mengunarvörnum. Búið er að breikka bílinn með því að setja 4 cm útvíkkun innan við felgurnar til að koma hjólunum utar (sporvíddin er því alls 8 cm utar en frá verksmiðju sem gerir bílinn stöðugri). Toppgrindin er aukabúnaður og stiginn upp á bílinn.
 
Nánast enginn lúxus
 
Ekki fer mikið fyrir lúxus í bílnum, ekki útvarp, hiti í stýri eða sætum og enginn akreinalesari. En að fá níu manna bíl fyrir þennan pening, þá má ýmislegt vanta. Fyrir mína parta þá fannst mér bíllinn hreint æðislegur, fljótur að ná umferðarhraða og ágætt að keyra hann. Bremsur eru góðar og maður situr hátt og sér vel yfir í umferðinni. Bíllinn er einfaldur og hann kemst þangað sem maður ætlar sér. Plássið inni í Rússanum er mun betra en í mörgum öðrum bílum sem taka jafn marga farþega. Það sem er í bílnum er sterklega smíðað og er greinilega ætlað til að endast samanber varadekksfestinguna sem er úr alvöru stáli rétt eins og toppgrindin og stiginn upp á þakið.
 
Ætti að henta vel í ýmsan rekstur
 
Eftir að hafa ekið bílnum nálægt 50 km tel ég hann vera kjörinn fyrir ferðaþjónustuaðila sem eru t.d. með hestaferðir, kajakferðir, reiðhjólaferðir eða sem fylgdarbíll á fjöll og á torfæra vegi. Drif á öllum hjólum og hátt og lágt drif. Í minningunni var Rússajeppinn afar duglegur í miklum snjó þegar búið var að keðja öll hjól. Svo er ekki mikið mál að hækka bílinn upp enn frekar, setja á hann 33–38 tommu dekk fyrir enn erfiðari torfærur og snjóakstur þar sem vélin er orðin svona mikið stærri en hún var í gamla bílnum. 
 
Sérstakur og vekur athygli
 
Jeppinn er spennandi kostur fyrir vonda íslenska vegi og engin furða að hann veki athygli þeirra sem sjá hann á ferðinni. 
 
Allar nánari upplýsingar um bílinn og innflutningsaðila má nálgast á vefsíðunni www.russajeppar.is. 
 
Gömlu hásingarnar, en nú eru bara þrjú fjaðrablöð í stað 13 áður.
 

7 myndir:

„Spjallað“ við kýr
Á faglegum nótum 9. janúar 2023

„Spjallað“ við kýr

Atferli, hegðun, útlit og ástand nautgripa getur gefið gríðarlega mikilvægar upp...

Skógarbændur og Bændasamtök Íslands
Á faglegum nótum 5. janúar 2023

Skógarbændur og Bændasamtök Íslands

Á aðalfundi Landssambands skógareigenda (LSE) sem haldinn var í Borgarnesi í maí...

Lífræn framleiðsla – nú er lag
Á faglegum nótum 5. janúar 2023

Lífræn framleiðsla – nú er lag

Á undanförnum árum hefur VOR látið til sín taka með ýmsum hætti til að hvetja ti...

Eitur á alltaf að vera síðasta úrræðið
Á faglegum nótum 3. janúar 2023

Eitur á alltaf að vera síðasta úrræðið

Meindýr eru skaðvaldar í garð- og skógrækt og óvelkomnir gestir sem flestir vild...

Ýmsir vankantar við smíði nýju norrænu næringarráðanna
Á faglegum nótum 2. janúar 2023

Ýmsir vankantar við smíði nýju norrænu næringarráðanna

Vinna við norrænu næringarráðin (NNR), sem Norræna ráðherra­nefndin heldur utan ...

Um niðurstöður lambadóma haustið 2022
Á faglegum nótum 30. desember 2022

Um niðurstöður lambadóma haustið 2022

Í heildina var útkoma lamba í haust góð. Meðalfallþungi á landinu var 16,6 kg og...

Lífrænn úrgangur: höfuðverkur eða tækifæri?
Á faglegum nótum 28. desember 2022

Lífrænn úrgangur: höfuðverkur eða tækifæri?

Hér á landi fellur til gríðarlegt magn af lífrænum úrgangi á öllum stigum samfél...

Skýrsluhald – heimarétt WorldFengs
Á faglegum nótum 27. desember 2022

Skýrsluhald – heimarétt WorldFengs

Nú þegar líður að áramótum og allir eru búnir að skila haustskýrslu til matvælar...