Glæsilegur brúðarvöndur með rósum og öðru fallegu efni. Myndir / Rósa Björk Jónsdóttir.
Fræðsluhornið 07. apríl 2020

Fjölbreytt og skapandi nám í blómaskreytingum

Bryndís Eir Þorsteinsdóttir

Sérstök blóma­skreytinga­braut er við Garðyrkjuskóla LbhÍ á Reykjum í Ölfusi, rétt við Hveragerði. Uppbygging náms­ins skiptist í bóklegt nám tvo vetur í skólanum og verknám sem fer fram á verknámstað, t.d. í blómaverslunum. Fjarnám er á hálfum hraða og tekur fjögur ár auk verknáms. 

Á námstímanum fá nem­endur kennslu og þjálfun í öllum helstu aðferðum við með­höndlun og notkun blóma við blóma­skreytingar. Ítarlega er farið yfir form og litafræði og nemendur vinna með öll algengustu stílbrigði blómaskreytinga.  Nemendur fá innsýn í rekstur blómaverslana og læra að setja fram vörur í verslunum. Auk þess er farið yfir meðferð afskorinna blóma og greina sem og pottaplöntur og meðferð þeirra.

Blanda bóknáms og verklegra æfinga

Námið er skemmtileg blanda af bóklegum áföngum og verklegum æfingum þar sem nemendur vinna fjölbreytt verkefni undir handleiðslu sérmenntaðra blóma­skreyta og sköpunargleðin fær svo sannarlega að njóta sín. Skólinn er lítill og nemenda­hópurinn samheldinn og þéttur, í náminu verða gjarnan til vinabönd sem halda ævina á enda.  

Blómaskreytingar henta vel þeim sem eru skapandi og finnst gaman að vinna með fallegt lifandi efni.

Að námi loknu fá nemendur starfsheitið blómaskreytir eða garðyrkjufræðingur af blómaskreytingabraut.

Eftir brautskráningu bjóðast margir möguleikar eins og að starfa sjálfstætt sem blómaskreytir og taka að sér fjölbreytt verkefni. Blómaskreytir getur séð um rekstur í blómabúð, ann­ast heild­sölu eða ráðgjöf til viðskipta­vina ásamt útstillingum í verslunum eða í tengslum við stærri viðburði. Starfið er ákaflega fjölbreytt og blómaskreytar eru þátttakendur í stærstu viðburðum í lífi viðskiptavina sinna, svo sem stórafmælum og brúðkaupum. 

Listrænn og skapandi starfsvettvangur

Námið býður upp á möguleika á framhaldsnámi erlendis auk þátttöku í alþjóðlegum keppnum á sviði blómaskreytinga. Þetta er tilvalinn vettvangur fyrir list­rænt og skapandi fólk sem hefur gaman af því að sinna handverki með lifandi efnivið. Starf blómaskreytis er áhugavert og fjölbreytt og getur veitt ýmis tækifæri í lífinu.

Orkidea er oft kölluð drottning blómanna.

Við erum byrjuð að taka við skráningum fyrir næstkomandi haust, þannig að tækifærið er núna. Nánari upplýsingar um námið má finna á heimasíðu skólans, www.lbhi.is.

Nemendur og kennarar á brautinni mæla með því að fólk fylgi þeim á facebook: Blóma­skreytingabraut Garðyrkju­skólinn Lbhí og á instagram: blóma­skreytingabraut_lbhi.