Breiðir út fegurð sauðkindarinnar
Lambadagatal Ragnars Þorsteinssonar, sauðfjárbónda í Sýrnesi, Aðaldal, er nú komið út tíunda árið í röð enda afar vinsælt.
Ragnar, sem er ljósmyndari með meiru, tekur myndirnar í dagatalið á sauðfjárbúi sínu í Sýrnesi, en þær eru allar teknar á sauðburði frá árinu áður. Í lambadagatalinu nú í ár má því sjá myndir sem teknar voru í sauðburðinum í fyrra, en þær endurspegla einnig veðurfarið frá þeim árstíma. Uppsetning og hönnun dagatalsins er einnig í höndum Ragnars, sem og fjármögnun þess og sala. Dagatalið hefur verið fjármagnað á Karolina fund síðastliðin átta ár og hefur það verkefni alltaf gengið upp.
„Þetta átti nú bara að vera til gamans svona einu sinni, prufa að gefa út dagatal með ljósmyndum af ómörkuðum unglömbum og forvitnast um hvort einhverjir hefðu áhuga á því og þetta er eiginlega búið að vera ævintýri síðan,“ segir Ragnar.
„Ég stofnaði Facebook-síðuna Lamba Lamb undir veffanginu facebook.com/lambidmitt og þar seldist fyrsta upplagið upp á örfáum dögum. Það er orðinn allnokkur hópur fólks sem kaupir og hefur keypt dagatölin frá upphafi. Fylgjendur síðunnar eru í dag orðnir rúmlega 1.500 og hún er mikið skoðuð. Maður bæði hittir og á í samskiptum við fólk um allt land, sem er bara skemmtilegt – og svona markaðssetning væri ekki möguleg ef ekki væri fyrir netið og viðlíka samfélagsmiðla. Það hafa verið frábærar móttökur við þessari hugmynd minni og ég fengið mikið lof fyrir fallegar ljósmyndir og útlit dagatalsins. Salan fer eingöngu fram hér, „beint frá býli“,“ segir Ragnar en sala þeirra í verslanir vakti ekki áhuga hans vegna hárrar álagningar og viðlíka vesens.
Hróður dagatalanna hefur farið víða, jafnvel selst utan landsteinanna, en þó ekki í bílförmum. „Bretland, Þýskaland, Noregur, Danmörk, USA/Kanada ... það lengsta sem ég veit um að Lambadagatal hafi farið er til Japan!“ segir Ragnar.
Hann segir megintilgang útgáfunnar fyrst og fremst þann að breiða út fegurð og fjölbreytileika íslensku sauðkindarinnar sem hefur séð þjóðinni fyrir mat og hita frá landnámstíð, því án hennar værum við tæplega til sem þjóð í dag.
„Allir hefðbundnir helgi- og frídagar eru merktir á dagatalið, einnig fánadagar, fæðingardagur forseta, koma jólasveinanna, eldaskildagi, gömlu mánaðarheitin, tunglgangur og ýmsir dagar er tengjast sögu lands og þjóðar. Hver mánuður er með eina mynd og að þessu sinni er dagatalið tileinkað mæðrum með lömbin sín auk hefðbundinna lambamynda. Í tilefni af tíu ára útgáfuafmæli fylgir svo eitt lambakort/umslag með hverju dagatali,“ lýkur Ragnar máli sínu.
Fyrir áhugasama má finna dagatölin á www.facebook.com/ lambidmitt – lambidmitt@gmail. com og hjá Ragnari sjálfum í síma 847-6325.
