Blautklútaveiðar í Faxaflóa
Í Grunnslóðaleiðangri Hafrannsóknastofnunar eru stundaðar rannsóknir á flatfisktegundum, sandsíli og sæbjúgum á grunnslóð allt í kringum landið. Í ár var nýs og óskemmtilegs meðafla vart, en blautklútar, ættaðir úr skólpi þéttbýlisstaða, voru algengir í togum við Faxaflóa.
Samkvæmt frétt á vef Hafrannsóknastofnunar fengust blautklútar í flestum togum í Grunnslóðarleiðangri við flóann en mest var magnið við Akranes og við mynni Borgarfjarðar, eða tæp 2 kíló við Akranes og rúmt kíló í Borgarfirði. Auk blautklútanna „veiddust“ ýmsar aðrar hreinlætisvörur, eins og dömubindi, eyrnapinnar, latexhanskar og umbúðir sem eiga líklega rætur að rekja til skólps. Hafrannsóknastofnun hefur ekki skráð hreinlætisvörur til „tegunda“ í leiðöngrum sínum en það er upplifun leiðangursmanna að magn hreinlætisvara sé mun meira í ár en árin á undan.
Ekki sturta niður rusli
Fólk er því hvatt til að passa sig að henda þessum hlutum í ruslið, en ekki sturta þeim niður, því að jafnvel þó að á umbúðunum segi að klútarnir séu niðursturtanlegir, þýðir það ekki að þeir brotni hratt niður í náttúrunni.
Stofnmæling flatfiska og sandsílis
Í leiðangrinum er togað með fjögurra metra bjálkatrolli á grunnsævi. Markmið leiðangursins er stofnmæling á flatfiskum og sandsíli. Sérstaklega er verið að reyna að fá mat á nýliðun flatfiska.
Í ár var einnig bætt við leiðangurinn togstöðvum til að fylgjast með þéttleika sæbjúgna en vonir standa til að niðurstöðurnar muni nýtast við ráðgjöf á þessum nýja nytjastofni er frá líður.