Bjargvættir

Um miðjan desember sást til kinda í sumarbústaðalandi í Jódísarstaðaskógi við Skjálfandafljót. Við nánari athugun kom í ljós að um var að ræða þrjú hvít lömb. Þá voru liðnir um þrír mánuðir frá því að hefðbundinni smölun var lokið. Nokkur umferð hafði verið í skóginum, bæði frá bústöðum og við grisjun hans, en ekkert sést til kinda. Einnig hafði verið nokkuð leitað á svæðinu að svarbotnóttri veturgamalli á með svart lamb úr Sýrnesi. Um hádegi á Þorláksmessu sást svo aftur til þeirra við góðar aðstæður og þá var smalað saman góðu liði sem hljóp frá skötu og öðru Þorláksmessugóðgæti til smalamennsku!

Eftir tiltölulega stutta en snarpa atlögu náðust svo lömbin og þá kom í ljós að þau voru frá Sýrnesi í Aðaldal. Var þá búið að afskrifa þau úr bókhaldi og ekki talið að þau væru lifandi. Lömbin voru allvel á sig komin, nánast eins og þau væru að koma af kálbeit, metin af smölum í fituflokk 3+ og við vigtun voru hrútarnir 41 kg og 46 kg og gimbrin 39 kg. Þeim hefur síðan heilsast vel í húsi. Þrátt fyrir frekari leit hefur ekkert sést til þeirrar veturgömlu og lambsins hennar.