Vinsamlegast athugið að þetta efni er eldra en mánaðar gamalt.
Framtíðin er björt í garðyrkjugreinunum.
Framtíðin er björt í garðyrkjugreinunum.
Líf og starf 1. júní 2021

Fjölbreytt sumarstörf garðyrkjunema

Höfundur: Ingólfur Guðnason

Lokapróf nemenda á Garð­yrkju­skólanum eru að baki þetta vorið og sumarið bíður með fjölbreyttum verkefnum sem reyna á þekkingu þeirra á ólíkum sviðum.

Nemendur þurfa auk tveggja vetra bóknáms á Reykjum að ljúka 60 vikna verknámi á verknámsstað sem skólinn viðurkennir undir handleiðslu garðyrkjufræðings til að fá fullnaðarútskrift sem garðyrkjufræðingar.

Þannig tekur atvinnulífið virkan þátt í kennslunni og eykur þekkingu og færni nemenda á þeim sviðum sem þeir leggja áherslu á í sínu námi. Þetta fyrirkomulag hefur verið við lýði áratugum saman og hefur gefið góða raun.

Nemar á blómaskreytingabraut.

Brúðarvendir og skógarhögg

Nemendur á skrúðgarðyrkju­braut skólans taka til hendinni við margs konar lóðafrágang, gróður­setningu, hleðslur og hellulagnir, fjölbreytta garðaumhirðu í heimilisgörðum, við lóðir fyrirtækja og opinberu rými ásamt margvíslegri viðhaldsvinnu. Skógtækninemar vinna við umhirðu skóga og gróðursetningar, viðhald, ýmsa skipulagsvinnu, trjáfellingar og grisjun svo dæmi séu nefnd. Nemar annarra námsbrauta sinna verkefnum sem hæfa þeirra áhugasviði. Nemar á blómaskreytingabraut fá meðal annars sumarstörf í blómaverslunum þar sem þeim gefst færi á að æfa sitt handverk.

Grænmeti, blóm og garðagróður

Nemendur í garðyrkjuframleiðslu stunda sitt verknám í gróðrar­stöðvum víða um land þar sem ræktað er græmeti í gróðurhúsum og á garðlöndum og að sumu leyti við úrvinnslu og sölu afurða sem stöðvarnar framleiða, eða þá við ræktun afskorinna blóma og pottaplantna, sem hefur aukist talsvert undanfarin ár. Aðrir vinna við framleiðslu og sölu garð- og skógarplantna. Nokkrir nemendur skólans hafa þegar stofnað til eigin atvinnurekstrar og sinna honum vitaskuld allt árið auk garðyrkjunámsins.

Aðkoma atvinnulífsins skiptir miklu máli

Farsælt samstarf skólans og atvinnulífsins er mikilvægur þáttur í að þjálfa nemendur til starfa í hinum ýmsu greinum garðyrkjunnar. Reyndir garðyrkju­fræðingar, bæði í einkageiranum og þeir sem starfa hjá ríki og sveitarfélögum taka þannig á sig ákveðnar skyldur við menntun nýrra garðyrkjufræðinga og eiga sinn þátt í ákvarðanatöku og stefnumótun um framtíð garðyrkjunámsins með setu í skólaráði og nefndum á veg­um skólans. Það hefur reynst skólanum mikilvægt að eiga þessa bakhjarla að og kunn­um við sem störfum við garðyrkjuskólann þeim bestu þakkir fyrir samstarf og stuðning þegar á hefur reynt.

Aðsókn í garðyrkjunám aldrei verið meiri

Mikil aðsókn hefur verið í garðyrkjunámið á Reykjum og aldrei meira en nú. Það helgast meðal annars af því að neytendur bera aukið traust til afurða sem íslenskir garðyrkjubændur framleiða og endurspeglast í stóraukinni neyslu innlendra garðyrkjuafurða, auk þess sem miklu meira hefur verið um að landsmenn ferðist innangarðs en dæmi eru um fyrr. Meðvitund landsmanna um kolefnis­bindingu eykur áhuga á ræktun hvers kyns gróðurs, hvort sem er í heimagarðinum, við sumarbústaðinn eða í skóg­ræktarlöndum og kallar aukinn áhugi almennings á garðyrkju á fleira fagmenntað fólk til ráðgjafar og starfa. Framtíðin er því björt í garðyrkjugreinunum.

Nemendur á skrúðgarðyrkjubraut skólans taka til hendinni við margs konar lóðafrágang, gróðursetningu, hleðslur og hellulagnir, fjölbreytta garðaumhirðu í heimilisgörðum.

Bændur í Bónorðsför
Líf og starf 26. júlí 2021

Bændur í Bónorðsför

Þýska sjónvarpsstöðin RTL heldur um taumana á einum ástsælasta raunveruleikaþætt...

Fjölbreytt sambland af dýra­um­hirðu og kennslu ólíkra listforma
Líf og starf 23. júlí 2021

Fjölbreytt sambland af dýra­um­hirðu og kennslu ólíkra listforma

Sóldís Einarsdóttir, myndlistarkennari, hestakona, hundaþjálfari og hundasnyrtir...

Listi yfir prjónaband
Líf og starf 22. júlí 2021

Listi yfir prjónaband

Áhugi fólks á að prjóna og hekla er gríðarlegur og úrvalið af bandi sömuleiðis m...

Buðu hestamönnum í saltkjötsveislu
Líf og starf 22. júlí 2021

Buðu hestamönnum í saltkjötsveislu

Um hundrað manns mættu til veisluhalda á Króksstöðum í Eyjafjarðarsveit á dögunu...

Spil sem miðlar þekkingu um plöntur
Líf og starf 22. júlí 2021

Spil sem miðlar þekkingu um plöntur

Flóruspilið gengur út á að læra að þekkja algengar íslenskar plöntutegundir. Sto...

Lífsstílslitaðar tískubylgjur eða fordæmi komandi kynslóða?
Líf og starf 22. júlí 2021

Lífsstílslitaðar tískubylgjur eða fordæmi komandi kynslóða?

Með flokkun, moltugerð og almennri meðvitund þegar kemur að því að bjarga heimin...

Gersemar sendar til varðveislu
Líf og starf 22. júlí 2021

Gersemar sendar til varðveislu

Gersemar og gögn úr geymslu Bændasamtakanna send í varðveislu – níu bretti til Þ...

Hraða gerð deiliskipulags vegna nýrra lóða í haust
Líf og starf 21. júlí 2021

Hraða gerð deiliskipulags vegna nýrra lóða í haust

Mikil eftirspurn er eftir lóðum í Varmahlíð í Skagafirði. Þrjár lóðir voru auglý...