Í nýju tölublaði Bændablaðsins er nýafstöðnu Búnaðarþingi gerð nokkuð ýtarleg skil í blaðauka. Veitt er yfirlit yfir ályktanir þingsins og þrír nýir stjórnarmenn Bændasamtaka Íslands teknir tali; þau Vigdís Sveinbjörnsdóttir, Guðný Helga Björnsdóttir og Árni Brynjólfsson. Þá er gerð grein fyrir veitingu landbúnaðarverðlaunanna árið 2010 sem komu í hlut bændanna á Hrauni á Skaga  og Grænhóli ...

Í nýju tölublaði Bændablaðsins er nýafstöðnu Búnaðarþingi gerð nokkuð ýtarleg skil í blaðauka. Veitt er yfirlit yfir ályktanir þingsins og þrír nýir stjórnarmenn Bændasamtaka Íslands teknir tali; þau Vigdís Sveinbjörnsdóttir, Guðný Helga Björnsdóttir og Árni Brynjólfsson. Þá er gerð grein fyrir veitingu landbúnaðarverðlaunanna árið 2010 sem komu í hlut bændanna á Hrauni á Skaga  og Grænhóli í Ölfusi.

Haraldur Benediktsson, sem var endurkjörinn formaður Bændasamtaka Íslands á þinginu með öllum greiddum atkvæðum, skrifar leiðara blaðsins:

„Við setningu þingsins flutti forstjóri Matís, Sjöfn Sigurgísladóttir, hvetjandi ræðu til bænda og landbúnaðar sem ástæða er til að hvetja lesendur Bændablaðsins að kynna sér. Ræða Sjafnar er ekki síst til merkis um þann auð sem þjóðin býr yfir í matarauðlindum sínum.

Verðmætasköpun á grunni þekkingarfyrirtækis eins og Matís hefur mikil áhrif til aukinna tækifæra og er ástæða fyrir bændur að kynna sér þá möguleika. Nauðsynlegt er að horfa til framtíðar á þau tækifæri sem kröftug matarframleiðsla landbúnaðar og sjávarútvegs getur skapað [...]

Við setningu Búnaðarþings var sagt frá nýrri viðhorfskönnun. Þar kemur sterkt fram hversu vel þjóðin metur landbúnað og starf bænda. Sagt var fyrir nokkrum árum, þegar BÍ lét fyrst gera sambærilega könnun, að ekki væri hægt að mæla jákvæðara viðhorf en þá var gert. Það er nú afsannað. Niðurstaða könnunarinnar er í góðu samræmi við það viðhorf sem hefur birst bændum á undanförnum misserum. Enda eru það hjáróma raddir sem hljóma í dag og telja landbúnað vera „vandamál“.

Þá er viðhorf fólks til aðildar að ESB afgerandi og ekki síður að framtíð landbúnaðar í landinu vegur þungt í þeirri afstöðu. Framtíð landbúnaðar, að hér sé framleiddur matur af fjölbreyttri gerð er ekki sjálfsagt mál og undir það tekur þjóðin. Þessvegna er ekki síður áhugavert að sjá viðbrögð við skýrslu framkvæmdastjórnar ESB sem send var hingað undir lok febrúarmánaðar.

Þar voru staðfest sjónarmið Bændasamtakanna í umræðu um ESB-aðild. Í skýrslu framkvæmdastjórnarinnar er sagt að grundvallarbreyting þurfi að verða á ríkjandi landbúnaðarstefnu hér á landi. Látum vera umræðuna um endurskoðun styrkjakerfis, hún hefur næstum „sjálfstætt líf“. Það á hins vegar að opna fyrir innflutning á lifandi dýrum. Hingað geta þá t.d. komið ný hestakyn, þannig að vafalaust verða landsmót hestamanna fjölbreyttari í framtíðinni, hvar svo sem þau verða haldin. Þetta gildir um alla búfjárstofna okkar og sumt vafalaust til bóta, myndi einhver segja. Sagan geymir mörg dæmi um hörmulegar afleiðingar af innflutningi lifandi dýra, án takmarkana, sem getur haft mikil áhrif á litla einangraða búfjárstofna. Fleira mætti nefna úr skýrslunni, en verður ekki gert hér. Undarlegt er hve hljóðlát umræða um skjalið hefur verið og þær staðreyndir sem það dregur fram, svo ekki sé minnst á þá staðreynd að ekkert er þar gert með að Ísland er eyja norður í hafi og að þjóðin þurfi að hafa einhverja möguleika á að verja fæðuöryggi sitt. Ekkert. Engar undanþágur sem svo oft er búið að nefna.“

Nálgast má nýtt tölublað Bændablaðsins með því að smella á forsíðumyndina hér á síðunni.